Հայաստանի կառավարությունը 2010 թվականի ապրիլի 8-ին կայացրել է «Հանրակրթության պետական չափորոշչի ձեւավորման եւ հաստատման կարգը եւ հանրակրթության պետական չափորոշիչը հաստատելու… մասին» N 439-Ն որոշումը: Այդ կարգը եւ այդ չափորոշիչը համապատասխանաբար շարադրվել են տվյալ որոշման N 1 եւ N 2 հավելվածներում: Մեկ տարի հետոՙ 2011թ. հուլիսի 28-ին, գործադիրի N 1088 որոշմամբ այդ հավելվածներից N 1-ում մեկ կետ հանվել է, իսկ N 2-ը (չափորոշիչը) շարադրվել է նոր խմբագրությամբ: Հետեւաբար, այս վերջինն էլ պետք է որ լինի մինչեւ այժմ գործողը: Բայց ԿԳՄՍ ներկայիս նախարարության մշակած ու այս օրերին քննարկվող նոր չափորոշիչների վերաբերյալ ՀՀ կառավարության որոշման հրապարակված նախագծով նախատեսվում է նոր խմբագրությամբ շարադրել ոչ թե այս, այլ հին տարբերակըՙ 2010 թ. որոշման նշված հավելվածները: Մասնագետ չլինելով, չենք կարող այս փաստը իրավական տեսանկյունից գնահատել, բայց զուտ տրամաբանորեն սա մի տեսակ անհասկանալի է թվում:
Հանրակրթության նոր չափորոշչի նախագծին մանրամասն ծանոթանալու եւ մանավանդ հնի հետ համեմատելու հսկայական դժվարին աշխատանքը դեռ հասցրած չլինելովՙ չենք ուզում դատողություններ անել, բայց առաջին հայացքից նկատած երկու բան այնուամենայնիվ նշենք: e-draft.am կայքում հրապարակված նախագծի «Միջնակարգ կրթության շրջանավարտի ակնկալվող կարողունակությունները եւ… ակնկալվող վերջնարդյունքները» բաժնի 4-րդ կետում գրված է նաեւ, թե սովորողները «… գրագետ հաղորդակցվում են մայրենի լեզվով եւ այլ օտար լեզուներով»: Ահավոր միտք է ստացվել, բայց անշուշտ, ցավալի վրիպման հետեւանք է, գուցե մի բաց թողած բութի խնդիր: Պարզապես ուզեցինք հեղինակների ուշադրությունը հրավիրել, որ նկատեն եւ ուղղեն, հանկարծ այդպես չմնա հաստատվելիք տեքստում:
Իսկ ահա մեկ ուրիշ հանգամանք արդեն լրջորեն անհանգստացրեցՙ խորացնելով նախարարության նախընթաց տարբեր քայլերից առաջացած ընդհանուր մտահոգությունը: Հանրային հեռուստատեսության հուլիսի 9-ի երեկոյան հարցազրույցում Պետրոս Ղազարյանը ԿԳՄՍ նախարար Արայիկ Հարությունյանին ի թիվս այլ հարցադրումների ներկայացրեց հասարակության մեջ շրջանառվող նաեւ այն տեսակետը, թե «Այս չափորոշիչներով դուք դաստիարակելու եք տեխնոկրատ սերունդ, որտեղ կուժեղանան բնագիտական առարկաները, իսկ այ, հայի ինքնության եւ ինքնաընկալման կողմը կթուլանա»: Նախարարը… չփորձեց իսկ ժխտել: «Մենք դաստիարակելու ենք Հայաստանի Հանրապետության քաղաքացի, որը դուրս գալով դպրոցից, լինելու է քննադատող, վերլուծող, հմտություններով եւ գիտելիքով զինված: Եվ էն ժամանակ ինքը իմանալու է, թե ինչպես էս հասարակության մեջ համակեցության կանոններին համապատասխան ապրի, ստեղծի երջանիկ հասարակություն եւ բարոյական հասարակություն: Էս է: Մնացածը արդեն ըստ մասնագիտությունների, ըստ նախասիրությունների…»,- ահա Արայիկ Հարությունյանի պատասխանի հիմնական մասը բառացի:
ԳԵՂԱՄ ՄԿՐՏՉՅԱՆ, Գյումրի
