«ԹՈՒՐՔԻԱՅԻ ԱԳՐԵՍԻՎՈՒԹՅԱՆ ԱՃԸ ՄԵՐ ՔԱՂԱՔԱԿԱՆՈՒԹՅՈՒՆԸ ՎԵՐԱՆԱՅԵԼՈՒ ԱՆՀՐԱԺԵՇՏՈՒԹՅՈՒՆ Է ՍՏԵՂԾՈՒՄ»

Երեկ կառավարության նիստում ՀՀ վարչապետ Նիկոլ Փաշինյանը, անդրադառնալով Ադրբեջանիՙ Մեծամորի ատոմակայանին հարվածելու սպառնալիքին, մասնավորապես նկատել տվեց, թե այդ երկիրը պետք է դիտարկել իբրեւ ահաբեկչական պետություն: «Հրադադարի վերականգնման գործում մեծ դեր ունեն ԵԱՀԿ Մինսկի խմբի համանախագահները եւ նրանց երկրները: Այս տեսակետից հատկապես արդյունավեր էր Ռուսաստանի ներգրավումը, որն արտահայտվեց ինչպես արտգործնախարարության, այնպես էլ ԶՈՒ գլխավոր շտաբների մակարդակով: Միակ երկիրը, որ փորձում էր ոչ թե հանդարտեցնել իրավիճակը, այլ առավել մեծ բռնություն հրահրել, Թուրքիան էր: Հաշվի առնելով այդ երկրի ապակայունացնող եւ ագրեսիվ քաղաքականությունը իրեն սահմանակցող մի շարք տարածաշրջաններում, եւ ավանդական հակահայկական քաղաքականությունը, որն արտահայտվում է Հայոց ցեղասպանության արդարացմամբ, այդ պահվածքը մեծ հաշվով անակնկալ չէր: Բայց նրա ագրեսիվության աճը առաջ է բերում մեր քաղաքականության որոշակի վերանայման անհրաժեշտություն,այդ թվումՙ Թուրքիայի ագրեսիվությունը զսպելու միջազգային ֆորմատներում մեր մասնակցության ծավալների իմաստով»: