Վառելիքաէներգետիկ ռեսուրսների խնայողության, շրջակա միջավայրի պահպանման, էներգետիկ անվտանգության տեսակետից կարեւոր նշանակություն ունի ուսուցման գործընթացը: Առաջարկում եմ նոր ուսումնական տարվանից Հայաստանի քոլեջներում մտցնել նոր առարկա՝ «Էներգախնայողություն»: Այն հնարավորություն կտա սովորողների մոտ առաջացնել հետաքրքրասիրություն այս հարցի վերաբերյալ: Մեր երկիրն աղքատ է վառելիքով: Այն բերում ենք դրսից հաղթահարելով բազմաթիվ դժվարություններ եւ խութեր: Հապաղելու իրավունք չունենք:
Էներգախնայողությունը իրավական, կազմակերպչական, գիտական, արտադրական, տեխնիկական եւ տնտեսական նպատակային գործունեություն է` ուղղված էներգետիկ ռեսուրսների տեսակարար ծախսի նվազեցմանը: Անցյալ դարի վերջին տասնամյակներում համաշխարհային առաջավոր էներգախնայողության փորձը ցույց տվեց, որ գործող տեխնոլոգիաների էներգախնայողական ներուժը կազմում է էներգածախսի 30-ից 40%-ը, իսկ վառելիքի տնտեսումը 2-ից 3 անգամ էժան է, քան համարժեք քանակությամբ վառելիքի արդյունահանումն ու մատակարարումը սպառողներին: Էներգախնայողությունը՝ որպես նոր աղբյուր, ավելի շահավետ է մյուս էներգաաղբյուրներից: Ըստ Միջազգային էներգետիկական գործակալության տվյալների` էներգախնայողական միջոցառումների իրագործման մեջ ծախսված յուրաքանչյուր դոլարն ավելի շատ «մաքուր» էներգիա է տալիս, քան այն դոլարը, որը ծախսվում է էներգիայի այլ աղբյուրների ստեղծման համար: Հարկ է ընդծել, որ խնայված էներգիայի զգալի մասը ձեռք է բերվում սպառման ոլորտում, եւ այդ էներգիան էկոլոգիապես մաքուր է, քանի որ նրա ստացման պրոցեսը արտանետումներ չունի եւ, ընդհակառակը, նվազեցնում է արտանետումները:
Ներկայում ՀՀ քոլեջներում ուսուցումը հիմնականում իրականացվում է առաձին մոդուլներով: Յուրաքանչյուր մասնագիտության համար կարելի է նախա-տեսել մոտ 20 ժամ դասաժամ:Հարցի դրական լուծման դեպքում հնարավոր է ֆիզիկայի ուսուցիչներին պատրաստել այս առարկայի դասավանդման համար:Հայկական էներգետիկական ակադեմիան պատրաստ է աջակցել եւ համագործակցել այս հարցի հետագա զարգացմանը:
ՍՏԵՓԱՆ ՊԱՊԻԿՅԱՆ
Հայկական էներգետիկական ակադեմիայի հիմնադիր նախագահ
