Տարբեր քաղաքներից եւ համայնքներից ստացած ծանուցումներին մեկ հպանցիկ հայացքն էլ բավական է, որ արձանագրենք, թե Գերմանիայում Հայոց ցեղասպանության 111-ամյակի հիշատակի եւ ոգեկոչման միջոցառումների շրջանակն ընդլայնվել է՝ քաղաքների աշխարհագրությունն ընդարձակվել՝ Քյոլն, Մայնի Ֆրանկֆուրտ, Բեռլին, Մյունխեն, Լայպցիգ, Համբուրգ, Շտուտգարդ եւ այլն, կազմակերպությունների թիվն ավելացել, եւ որ ամենից հուսադրողն է՝ առավել ակտիվ են դարձել երիտասարդները, որ ավագների հետ հատուկ երկյուղածությամբ են փայփայում այսօր՝ ապրիլ 24-ին, նաեւ նախընթաց եւ հաջորդող օրերին եկեղեցիներում, բանախոսությամբ, աղոթքով, խաչքարին եւ հուշարձանին խոնարհված ծաղկեպսակով, հայոց մեղեդին հնչեցնելով չմոռանալ 1915-ին մեր ժողովրդի հետ պատահած ոճիրը, մանավանդ որ ոգեկոչողների շարքերում այլեւս Հայոց ցեղասպանության ականատես վերապրողներ չկան: Ականատեսների ժառանգների՝ գուրգուրելի թվով երկրորդ սերնդի, երրորդ, չորրորդ, հինգերորդ սերնդի ներկայացուցիչները, մանավանդ Գերմանիայում թուրքական մեծաթիվ համայնքի, «Գորշ գայլերի» հայատյացության որոգայթում դիմադրում են՝ հիշելով, չեն խաբվում պատմության՝ դահիճների վերախմբագրվող տարբերակին, քանզի չեն կասկածում իրենց նախնիների՝ականատես մեծ մոր, մեծ հոր՝ իրենց փոխանցված պատմության ճշմարտացիությանը, ռեվիզիոնիզմի համար բաց ունկ չունեն: Առայժմ Բադեն Վյուրթեմբերգի նորընտրյալ վարչապետ Ջեմ Էոզդեմիրն է միակ գերմանացի բարձրաստիճան պաշտոնյան, որ ողջույնի ելույթով մասնակցելու է ապրիլի 24-ին ժամը 18.45-ին Շտուտգարդում կազմակերպված հիշատակի երեկոյին: Նա միակն է ԳԴՀ քաղաքական, պաշտոնական վերնախավում, որ 10 տարի անց հավատարիմ է մնացել իր ջատագոված՝ 2016-ի հունիսի 2-ին Բունդեսթագում Հայոց ցեղասպանության ճանաչման բանաձեւին: Թեմային կանդրադառնանք:
ԱՆԱՀԻՏ ՀՈՎՍԵՓՅԱՆ
Գերմանիա
