Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան այսօրվա ճեպազրույցում վիրավորական է անվանել հայաստանցի լրագրողի՝ Ադրբեջանի կողմից Ղարաբաղում պատմական հուշարձանների, ինչպես նաև Հայրենական մեծ պատերազմի հերոսներին նվիրված հուշարձանների ոչնչացման մասին հարցը։
Զախարովան հայ լրագրողին հարցրել է, թե ինչու նրանք չեն մտահոգվում այլ երկրներում խորհրդային զինվորների հուշարձանների ոչնչացման փաստերով։ «Արդյո՞ք Ուկրաինայում քանդված հուշարձանների և գերեզմանների մեջ չկային Կարմիր բանակի հայ զինվորների հուշարձաններ։ Ես երբեք չեմ լսել ձեզանից որևէ հարց կամ ցանկություն այս մասին խոսելու։ Ինչո՞ւ։ Մենք հիանալի հասկանում ենք, թե ինչ համատեքստում և ինչու եք բարձրացնում այս թեման։ Սա չպետք է արվի։ Սա արդեն անհարգալից է, սա վիրավորանք է։ Ես ևս մեկ անգամ ընդգծում եմ՝ Կարմիր բանակի զինվորների, ձեր հայրենակիցների հիշատակը համակարգված կերպով պղծվում է Եվրամիության տարածքում։ Որտե՞ղ եք դուք։ Որտե՞ղ է ձեր արձագանքը։ Միայն մեր երկիրն է խոսում և ամեն կերպ պաշտպանում նրանց։ Ինչի՞ մասին եք խոսում։ Սա արդեն անցնում է բոլոր սահմանները։ Կրկնում եմ՝ սա հրատապ հարց չէ, բարդ թեմա չէ։ Սա անհարգալից է», – հայտարարել է Զախարովան։
Հիշեցնենք Զախարովային, որ Արցախում ադրբեջանցիները հայկական պատմամշակութային հուշարձանները, նաև Հայրենական Մեծ պատերազմին նվիրված հուշարձանները ոչնչացնում են, որպեսզի ձերբազատվեն հայկական հետքից։ Ոչնչացնում են, որովհետև դրանք հայկական են, հայերն են կառուցել, ու կառուցել են իրե՛նց Հայրենիքում, Հայի՛ հայրենիքում։ Իսկ աշխարհի այլ երկրներում հայրենական Մեծ պատերազմի հուշարձանները ոչնչացնում են, որովհետև դրանք նվիրված են ռուս ժողովրդին, ռուսներն են դարձել Մեծ Հաղթանակի խորհրդանիշը։ Եվ այդ հուշարձանները կառուցվել են օտար երկրներում։
