Ադրբեջանը հետամուտ է՝ «Հայերը եկվոր են». տուրք չտանք անհիմն թեզերին

Բեռլինում Ադրբեջանի դեսպան Նասիմի Աղաեւը ապրիլի 4-ին X-ի իր հարթակում մատուցում է Բաքվում բնակվող ադրբեջանցի հետազոտող, քարտեզագետ ներկայացող Մահամմադ Մեհդիեւի հետեւյալ գրառումը. «Նիկոլ Փաշինյանի վերջին պնդումը, թե Քիզիլհաջիլի գյուղն «այսօր 100 տոկոսով Ադրբեջանի վերահսկողության տակ է», ճիշտ չէ եւ խոչընդոտում է խաղաղության բանակցություններին: Կից քարտեզը ցույց է տալիս, որ Հայաստանը վերահսկում է Քիզիլհաջիլիի մի մասը, դրա շրջակայքում գտնվող բարձունքների մեծ մասը»:

Եթե Մեհդիեւը գիտնական է, ապա ծանոթ պիտի լինի միջազգային ճանաչում ունեցող Ռուբեն Գալչյանի տեսակետներին: Ինչո՞ւ ՀՀ ԱԳՆ-ն չի տարածում Գալչյանի փաստական, հիմնավոր կարծիքը, մանավանդ որ Ռուբեն Գալչյանի գիտական լեզուն հայերենի հետ նաեւ անգլերեն է:

Դրա կարիքն օրեցօր պահանջ է դառնում, մանավանդ, երբ X-ի հարթակում ադրբեջանցիները համարձակվում են արդեն ձեւակերպել, թե հասկանում են հրեաների՝ իրենց հողին վերատիրանալու ցանկությունը եւ Երուսաղեմում հրեա ոստիկանների հետ սաղեմահայերից իրենց պատկանող սեփականությունը ազատելու պահանջը: Հայը ոտքն ուր դնում է, ասում է՝ իմ հողն է, տեսանք դա Ղարաբաղում, գրում են ադրբեջանցիները՝ հրեաներին «սիրաշահելու», «հայերին եկվոր, ոչ թե բնիկ» իրենց թեզն անցկացնելու համար:

ԱՆԱՀԻՏ ՀՈՎՍԵՓՅԱՆ

Գերմանիա