Առողջապահության նախարարությունը խուսափում է հրապարակել կորոնավիրուսի հետևանքով մահացած այն անձանց տվյալները, որոնք պատվաստվել էին կորոնավիրուսի դեմ։ Նախարարությունը, սակայն, հաստատում է, որ պատվաստվածների շրջանում կան կորոնավիրուսի ընթացքը ծանր տանող քաղաքացիներ։
Գերատեսչությունից փորձել ենք տեղեկանալ, թե կորոնավիրուսային հիվանդությունով վարակված անձանց շրջանում պատվաստում ստացածների վերաբերյալ վիճակագրական տվյալներ, ի վերջո, գոյություն ունեն, թե ոչ, քանի որ մեկ ամիս առաջ կատարված մեր հարցմանը պատասխանել էին, թե այդ տվյալները մշակման փուլում են գտնվում, սակայն կառավարության նիստում առողջապահության նախարարը ինչ-որ թվեր էր հրապարակել։
Հոկտեմբերի 25-ի հարցման պատասխանը «Փաստինֆո»-ն ստացել է այսօր, եթե, իհարկե, այն կարելի է պատասխան համարել։ Մասնավորապես՝ ԱՆ-ին խնդել էինք հայտնել, թե ՀՀ-ում պատվաստում ստացած անձանցից քանիսն է վարակվել կորոնավիրուսով ու ինչպես է ընթացել հիվանդությունը։ Սակայն նախարարությունն ամփոփ տվյալներ տրամադրելու փոխարեն՝ հայտնել է, թե 6 օր առաջ կորոնավիրուսով հիվանդների շրջանում քանիսն են եղել պատվաստված։ Այսպես՝ 2021 թվականի հոկտեմբերի 28-ի դրությամբ դրական ակտիվ դեպքերի՝ 30.433 քաղաքացիների շրջանում պատվաստված են եղել 1702-ը, իսկ 3100 հոսպիտալացվածներից պատվաստված է եղել 96-ը։
Նախարարությունը տրամադրել է միայն մեկ օրվա տվյալ՝ այն էլ կորոնավիրուսով վարակվածների թվից, չներկայացնելով, թե ի վերջո քանի՞ քաղաքացի է պատվաստվել ու նրանցից քանի՞սն է մինչև մեր հարցման օրը վարակվել կորոնավիրուսով։ Նախարարությանը գրավոր հարցում ստանալուց հետո դիմել ենք բանավոր՝ խնդրելով մեր հարցերին ուշադիր ծանոթանալ ու դրանց տալ սպառիչ պատասխան, ինչպես պահանջում է օրենքը, խոստացել են ճշտել ու ավելի ուշ արձագանքել։
Հատկանշական է, որ հոկտեմբերի 25-ին նախարարությանն ուղղված գրավոր հարցմանը պատասխանել են նոյեմբերի 3-ին ու ներկայացրել նույն տվյալները, որոնք հնչեցրել էր առողջապահության նախարարը՝ հոկտեմբերի 28-ի կառավարության նիստի ժամանակ։ Անահիտ Ավանեսյանը տեղեկացրել էր, որ վերակենդանացման բաժանմունքում գտնվող 1500 քաղաքացուց 5-ն է պատվաստված։
Նախարարությունից հետաքրքրվել էինք նաև, թե արդյոք կորոնավիրուսի հետևանքով մահացած անձանց թվում կա՞ն այնպիսի անձինք, որոնք երկրորդ կամ երրորդ անգամ էին վարակվում կորոնավիրուսով կամ պատվաստվել էին, սակայն կրկին պատասխան չենք ստացել։
Համավարակի հետեւանքով մահացածների տվյալներն ամեն օր հրապարակող առողջապահության նախարարությունը հանկարծ հիշել է, թե ՀՀ բնակչության մահացության տվյալները տրամադրվում են տարեկան կտրվածքով ՀՀ վիճակագրական կոմիտեի կողմից՝ ըստ քաղաքացիական կացության ակտերի։
Մինչդեռ՝ ըստ առողջապահության նախարարության այսօր հրապարակած տվյալների՝ 2021թ. նոյեմբերի 3-ի դրությամբ, ընդհանուր առմամբ, մահացել է կորոնավիրուսով հիվանդ 7803 քաղաքացի, որոնցից 1312-ի մահվան բուն պատճառը հանդիսացել ուղեկցող այլ հիվանդությունը։ Սակայն ԱՆ-ն խուսափում է ասել, թե մահացածների մեջ կան արդյոք կրկնակի վարակվածներ կամ պատվաստվածներ, թե ոչ։ Սա կարող է ունենալ երկու բացատրություն՝ կամ ԱՆ-ն իսկապես չի կատարում որեւէ հետազոտություն՝ առանց որի համավարակի դեմ պայքարն ուղղակի տապալված է, կամ էլ՝ ցուցանիշները բավականին տխուր են, ուստի նախընտրում են դրանք թաքցնել։
«Փաստինֆո»-ն մինչև պաշտոնական հարցումը ահազանգ էր ստացել այն մասին, որ նույն ընտանիքի անդամ հանդիսացող երեք չափահասները պատվաստված լինելով կորոնավիրուսի դեմ՝ վարակվել են կորոնավիրուսով։ Ավելին՝ վարակվել են նաեւ ընտանիքի հետ հաղորդակցված այլ հարազատներ եւս՝ պատվաստված լինելով հանդերձ։
Նկատի ունենալով, որ մեր շրջապատում բազմաթիվ են նման դեպքերը՝ ԱՆ-ին խնդրել էինք նաեւ պարզաբանել, որ եթե պատվաստված լինելը չի բացառում կորոնավիրուսով վարակվելը, ապա ինչո՞ւ թեստավորում չի պահանջվում նաև պատվաստված անձանցից՝ նախարարությունը կրկին պատասխան չունի։ Գրավոր պատասխանում ուղարկել էին ինչ-որ կայքի վրա հղման հասցե եւ մեր կրկնակի հարցապնդումից հետո միայն նշել, թե նման պահանջ գոյություն չունի։
Առողջապահության նախարարությունը պատասխանել է միայն մեկ հարցի՝ արդյոք ՀՀ-ում առկա պատվաստանյութերը արդյունավետ են Դելտա շտամի դեմ պայքարում։ Միանշանական պնդելով, թե «ՀՀ-ում կիրառվող բոլոր պատվաստանյութերը արդյունավետ են Դելտա շտամի նկատմամբ»։ Թե քանի տոկոսով, նախարարությունը չի մանրամասնում՝ պարզ իմանալով, որ պատվաստանյութերը 100 տոկոսանոց արդյունավետություն չեն ապահովում կորոնավիրուսի դեմ և որ պատվաստանյութի արդյունավետությունը գնահատելու ուղղակի միջոց չկա՝ միայն անուղղակի:
Հակապատվաստումային քարոզչություններից խուսափելով՝ նախարարությունից տվյալներ ու վերլուծություններ էին ակնկալում, բայց պարզ է դառնում, որ նախարարությունը պարզապես չունի դրանք։ Մինչդեռ ցանկացած մշակվող քաղաքականության հիմքում պետք է դրվեն վերլուծությունների արդյունքները, եթե ուզում ենք ունենալ արդյունավետություն։ Մեր բազմաթիվ հարցումների պատասխաններն իմի բերելով կարող ենք փաստել՝ նախարարությունը չի կարողանում կամ չի ցանկանում կատարել պատշաճ ուսումնասիրություններ, որի հետեւանքով էլ տապալվել է թե համավարակի դեմ պայքարը եւ թե հանրության մոտ թյուր կարծիք է ձեւավորվել պատվաստվելու գործընթացի նկատմամբ։ Մի մասը ուղղակի այն վտանգավոր է համարում, մյուսն էլ կարծում, թե պատվաստվելով ձերբազատվում է կորոնավիրուսից ու հակահամաճարակային կանոններին հետեւելու կարիք չունի։
Նախարարության ոչ կոպմետենտ աշխատանքի պատճառով համավարակն ուղղակի գրոհում է՝ խլելով հազարավոր կյանքեր։
Աղբյուր` Փաստինֆո
