ՀՀ երկրորդ նախագահ Ռոբերտ Քոչարյանն այսօր՝ փետրվարի 17-ին, հանդես է եկել մամլո ասուլիսով։
Նա անդրադարձել է հայկական Զինված ուժերի այսօրվա վիճակին՝ նշելով. «Պատերազմից հետո գրեթե չի արվել ոչինչ՝ բանակի սպառազինությունն ու մարտունակությունը վերականգնելու համար։ Սյունիքի անցյալ տարվա դեպքերը դրա վառ ապացույցն են։ Իսկ 300-400 դոլարանոց լրտեսների բացահայտումը խոսում է մեր ԶՈՒ-ում բարոյահոգեբանական վիճակի մասին։ Բանակի հաստատված բյուջեն որևէ բան չի հուշում, որ որևէ բան կփոխվի։ Այնպիսի տպավորություն է, որ այս իշխանությանը մարտունակ բանակ պետք չէ։ Դատախազի աշխատավարձն ավելացնելիս մոռանում են, որ սպաներին խրախուսելը շատ ավելի կարևոր է»։
Ռոբերտ Քոչարյանը վերլուծել է ՀԱՊԿ-ի՝ Հայաստանի անվտանգության գործերին չմիջամտելու հանգամանքները։
«Հիշենք, որ ՀԱՊԿ-ի երկրները, բացի Ռուսաստանից, բոլոր ոլորտներում Ադրբեջանի հետ ունեն ջերմ հարաբերություններ։ Կենտրոնական Ասիայի երկրների ժողովուրդները թուրքական աշխարհի մաս են կազմում։ Հետևաբար, մտածել, որ ՀԱՊԿ-ը որևէ կերպ կարող է արձագանքել Հայաստանի վրա հարձակմանը, միամտություն կլինի։ Դա ուղղակի բացառվում է։ Խոսքն այն մասին չէ՝ ՀԱՊԿ-ը մեռած կառույց է, թե ոչ։ Լավ էլ աշխատող կառույց է և աշխատում է այնտեղ, որտեղ բոլորի շահերը համընկնում են։ Տեսանք, որ աշխատեց Ղազախստանում»,- ասել է Քոչարյանը։
«ՄՆա՞լ ՀԱՊԿ-ում, թե չմնալ» հարցին Ռոբերտ Քոչարյանը միանշանակ պատասխան է տալիս՝ իհարկե, մնալ։ Նախ՝ չկա այլ կառույց, որը կարող է փոխարինել ՀԱՊԿ-ին, երկրորդը՝ այդ կառույցի շրջանակում կան պայմանագրեր, որոնց մաս ենք կազմում նաև մենք։ Բայց անվտանգության տեսանկյունից ՀԱՊԿ-ի հետ հույսեր չկապենք։
