Աղբյուրՙ Սպուտնիկ Արմենիա
Ռուսաստանցի հայտնի իրավաբան-միջազգայնագետ, Հաագայի միջազգային դատարանի դատավոր Կիրիլ Գեւորգյանն ընտրվել է Հաագայի դատարանի փոխնախագահ: Ինչպես հայտնում է Ռուսաստանի ԱԳՆ-ն, ընտրությունները կայացել են փետրվարի 8-ին: Մինչեւ դատարանի կազմում ընտրվելը` մինչեւ 2014թ.-ը Գեւորգյանը Ռուսաստանի դիվանագիտական ծառայության համակարգում զբաղեցրել է պատասխանատու պաշտոններ, այդ թվում ՙ 2003-2009 թվականներին Նիդեռլանդներում Ռուսաստանի Դաշնության արտակարգ եւ լիազոր դեսպանի պաշտոնը: Ռուսաստանի արտաքին քաղաքական գերատեսչության հաղորդագրության մեջ ասվում է, որ Գեւորգյանիՙ ՄԱԿ-ի գլխավոր դատական մարմնում նման պատվավոր պաշտոնում ընտրվելը նրա եւ ընդհանուր առմամբ ռուսական միջազգային-իրավական դպրոցի բարձր հեղինակության մասին է խոսում: ԱԳՆ-ում համոզված են, որ Գեւորգյանը կարեւոր ներդրում կունենա վեճերի խաղաղ կարգավորման սկզբունքի իրականացմանն ուղղված միջազգային դատարանի արդյունավետ աշխատանքի ապահովման գործում: Կիրիլ Գեւորգյանը ռուս հայտնի դերասանուհի Մարինա Նեելովայի ամուսինն է:
