– Ուզում ենք աշխատել, բայց չենք կարող, որովհետեւ երեխային ոչ ոքի չենք կարող վստահել:
Փետրվարի 8-ին Երեւանի քաղաքապետարանի մոտ ծնողները պահանջում էին բացել մանկապարտեզները եւ բողոքի ակցիա էին կազմակերպել: Քաղաքային իշխանությունը պնդում է, որ հարցը մոտ ժամանակներս կլուծվի: Սակայն ծնողները պահանջում էին հստակություն, թե երբ են մանկապարտեզները վերսկսելու իրենց աշխատանքը:
«Ծնողների մեծ մասը չեն կարողացել գալ, քանի որ չգիտենՙ ում մոտ թողնեն երեխաներին», մեզ հետ զրույցում ասաց Մարինե Հայրապետյանը :
Զրուցակիցս նշեց, որ իր երեխային մանկապարտեզ ընդունելու համար գրանցել է դեռեւս 2019 թվականի հունիսին, բայց հարցը հետաձգվել է համավարկի եւ սահմանափակումների պատճառով:
Ծնողները նշում են, որ այս ընթացքում շատացել են մասնավոր մանկապարտեզները:
«Ծնողների մի մասը ստիպված է երեխաներին մասնավոր մանկապարտեզներ տանում: Բայց ոչ բոլորը կարող են այդպես վարվել: Իմ ընտանիքում աշխատում է միայն ամուսինս, իսկ ես չեմ կարողանում աշխատել, քանի որ պետք է մնամ տանըՙ երեխայիս հետ», ասում է Ելենա Մանուկյանը , որը եկել էր իր 4-ամյա երեխայի հետ: Կինն ասում է, որ չի հասկանում պետական մանկապարտեզները փակ պահելու իմաստը, երբ մասնավորները աշխատում են:
Հավաքված ծնողներից մեկն էլ նշեց, որ չնայած նախընտրում է պետական մանկապարտեզը, սակայն ստիպված է երեխային վճարովի մանկապարտեզ ուղարկել: Մեկ այլ ծնող էլ նշում էր, որ ստիպված դուրս է եկել աշխատանքից, որ կարողանա երեխային խնամել:
Ծնողների պահանջը մեկն էրՙ վերսկսվեն մանկապարտեզների բնականոն ընդունելությունները, քանի որ իրենց նման շատ մայրիկներ չգիտենՙ գնալ աշխատանքի, թե՞ մնալ երեխայի հետ, իսկ մասնավոր մանկապարտեզները թանկ «հաճույք են»:
Ծնողներից մեկըՙ Զարուհի Սարիբեկյանը նշեց. «Մեր տան շրջակայքի երեք մանկապարտեզներից ոչ մեկում տեղ չկա. արդեն կես տարի է, ինչ սպասում եմ, բայց կան ծնողներ, որ նույնիսկ իրենց բալիկներին երկու տարի առաջ են գրանցել, ու ոչ մի առաջընթաց չկա: Վերջերս գնացել եմ նաեւ թաղապետարան, մանկապարտեզների բաժնի պատասխանատուն ինձ պատասխանել է, որ մինչեւ սեպտեմբեր, պայմանավորված համավարակով, մանկապարտեզներում ընդունելություն չի լինելու. հիմա առաջնահերթությունները հիմնականում տրվում են միայնակ ծնողներին ու անապահով ընտանիքներին, նաեւ զինծառայողների ընտանիքներին: Բայց մեր ծնողների մեջ կան զինծառայողների ընտանիքների ներկայացուցիչներ, որոնց եւս առաջնահերթություն չի տրվել»:
Երեւանի մանկապարտեզներում այս պահին ավելի քան 12 հազար հերթագրված երեխա կա, իսկ այժմ հաճախում է 15 հազար երեխա: Քաղաքապետարանի մամուլի խոսնակ Հակոբ Կարապետյանի խոսքովՙ հիմա քննարկումներ են ընթանում հարցին լուծում տալու համար. «Հիմա շատ ակտիվ քննարկում է, եւ մենք լուծմանը շատ մոտ ենք: Կարծում եմ առաջիկա օրերին ինչ-որ լուծում կլինի, եւ մենք դրա մասին կհայտարարենք»:
Պետք է նշել, որ դպրոցները եւ համալսարանները հակահամաճարակային սահմանված կարգերին համապատասխան վերսկսել են դասերըՙ առկա եղանակով:
Օրերն անցնում են, երեխաները մեծանում, իսկ նրանց անունները դեռ հերթագրված են մանկապարտեզների ընդունելության ցուցակներում:
