Սեպտեմբերի 18-ին Իտալիայի Տրեւիզո քաղաքում բացվելու է «Հայաստան. մի ժողովրդի հետքերը» վերնագրով ցուցահանդեսըՙ «Ֆեդեր Պիացցա Օնլուս» հիմնադրամի նախաձեռնությամբ եւ Տրեւիզո քաղաքի հովանավորությամբ: Այն ներկայացնում է Հայաստանի իրականությունըՙ Ցեղասպանությունից սկսած մինչեւ դրա բերած հետեւանքները:
Ըստ «Նոտիցիե պլյուս» լրատվամիջոցի լրագրող Լուչիա Ռուսսոյի ՙ «Այն կլինի մի ներածական ուղի դեպի հայ ազգի համալիրությունըՙ նրա պատմության հազարամյա ճանապարհորդության մեջ, որը դարերի ընթացքում ստեղծել է շատ հարուստ մշակույթ: Այն մեզ է հասել վեհության եւ տառապանքի պատմության միջով, այժմ զուրկ մարդկային եւ տարածքային միասնությունից:
Որո՞նք են պատճառները եւ ինչպիսի՞ն են առանձնահատկություններն այն քաղաքակրթության, որը լինելով աշխարհում դեռեւս ներկա եւ կենդանի, բախումնային իրավիճակներ է կրում իր ոչ վաղ անցյալի պատճառով եւ շարունակում է վառ պահել իր մշակութային եւ հոգեւոր պատմությունը: Առաջին քրիստոնյա երկիրը, որն իր հաստատուն խիղճը կազմավորեց իր կրոնի մեջ, հավատարիմ է մնում ինքնավարության եւ ազատության սկզբունքներին նույնիսկ չլինելով ինքնակառավարման իրավիճակում ու դիմադրելով մշակութային եւ կրոնական համահարթեցման ճնշումներին:
Ցուցահանդեսը հրավիրում է ձեզ հայտնաբերելու այս եզակի ժողովրդի նշաններն ու հետքերը, որի պատմությունը մտորումի եւ մոտեցման մի պահ է առաջարկում ներկա աշխարհին»:
Ցուցահանդեսի կազմակերպմանը մասնակցել է Վենետիկի Մխիթարյան միաբանության անդամ հայր Վահան Օհանյանը : Նախատեսվում է պրոֆեսոր Սանդրա Ֆաբրո Կանցիանի «Հայոց ցեղասպանությունը. երեկվա պատճառներից մինչեւ այսօրվա հետեւանքները» գրքի շնորհանդեսը:
