«Ազգի» փետրվարի 28- ի համարում տպագրված մեր հոդվածը վերնագրել էինք այսպեսՙ «Ավստրիայում ՀՀ դեսպանությունը APA-OTS- ին պիտի ներկայացնի 1992- ի «Նեզավիսիմայա գազետան»: Այս նկատառմանը հանգել էինք ծանուցելով, թե Վիեննայում Ադրբեջանի դեսպանությունը վերոհիշյալ տեղական գործակալության լրատվահոսքում Խոջալուի մասին տեղեկատվություն էր տարածել մի հարթակում, որը բոլորին հասանելի է. Քանի որ Ավստրիայի մամլո գործակալությանՙ APA- ի դուստր ձեռնարկությանՙ OTS- ի էջերում տպագրվող բնագիր նյութերը չեն խմբագրվում, դրանց համար պատասխանատվություն է կրում բացառապես հեղինակըՙ վճարի դիմաց, Ադրբեջանի համար «փաստարկված», բայց իրականում փաստախեղված, ամուր կմախք չունեցող շարադրանքը հեշտ էր իրացնել:
Մարտի 11- ին Ավստրիայում ՀՀ դեսպանությունը նույն հարթակում հանգամանալից պատասխանեց Ադրբեջանի նախահարձակ շարադրանքինՙ վկայակոչելով նաեւ Դանա Մազալովայի 2020- ի փետրվարի 17- ին «Արմենպրեսին» տված հարցազրույցը, որով լրագրողը վերահաստատել է 1992- ի ապրիլի 2- ի «Նիզավիսիմայա գազետայում» տպագրված Այազ Մութալիբովի տեսակետը, թե Խոջալուն կազմակերպել է Ադրբեջանի ընդդիմությունը: Նույն հոդվածում Հայաստանի դեսպանությունը հիշատակում է նաեւ, թե Խոջալուի մասին Ադրբեջանի իշխող ուժի տարածած պաշտոնական դարձած տեսակետից տարբերվող վարկածի համար 2007- ին ազատազրկվել է հետաքննող լրագրող Էյնուլլա Ֆաթուլայեւը, իսկ ՄԻԵԴ- ը 2010- ի ապրիլի 22- ին սույն գործով Ադրբեջանի դատարանի վճիռն անօրինական է համարելՙ պահանջելով լրագրողի անհապաղ ազատ արձակումը :
Ադրբեջանը տարածք է որոնումՙ ոչ միայն հողային, այլեւՙ տպագիր: Մեր փաստերն արտոնում են նախահարձակ լինել:
