«Դաշինքի խնդիրը ոչ թե հակառակորդի հետ պայմանավորվելն է, այլ սեփական կամքը թելադրելը»
Նախորդ շաբաթ Ռուսաստանի ԱԳՆ-ում հայտարարել էին ՆԱՏՕ-ի հետ քաղաքացիական եւ ռազմական համագործակցությունն ամբողջովին դադարեցնելու մասին: Նման հայտարարություն էր արել ՌԴ փոխարտգործնախարար Ալեքսանդր Գրուշկոն ՌԻԱ գործակալությանը տված հարցազրույցում:
Դիվանագետն ասել էր, որ ժամանակին ՆԱՏՕ-ն ստեղծվեց Արեւմուտքի երկրները ԽՍՀՄ-ի հարձակումից պաշտպանելու նպատակով: Եվ ներկայումս ՆԱՏՕ-ի գլխավոր քարտուղար Յենս Ստոլտենբերգը հայտարարում է, որ ՆԱՏՕ-ն ժողովրդավարության եւ ազատական կարգի պաշտպանության գրեթե միակ կառույցն է: Բայց, ըստ երեւույթին, դաշինքի գլխավոր իմաստը առավել ընգրկուն ձեւով արտահայտել է ՆԱՏՕ-ի առաջին գլխավոր քարտուղար լորդ Իսմեյը, այն էՙ պահել ամերիկացիներին Եվրոպայում, ռուսներին Եվրոպայից դուրս, իսկ Գերմանիանՙ Եվրոպայի տակ: Գրուշկոյի խոսքերովՙ այն տպավորությունն է ստեղծվում, թե վերոհիշյալ պնդման երրորդ մասը տակավին այժմեական է:
Գրուշկոն նշել է, որ դաշինքում առաջվա պես գլխավոր դերակատարը ԱՄՆ-ն է, եւ նայած թե ինչպես են փոփոխվում ԱՄՆ-ի ու Ռուսաստանի փոխհարաբերությունները, ըստ այդմ էլ ձեւավորվում են ՆԱՏՕ-Ռուսաստան հարաբերությունները: «ՆԱՏՕ-ն ինքն է հրաժարվել Ռուսաստանի նկատմամբ դրական օրակարգից: Այն գոյություն չունի, եւ ՆԱՏՕ-ում չգիտեն, թե ինչպես կարելի է դուրս գալ այդ փակուղուց: ՆԱՏՕ-ն չափազանց հեռու է գնացել Ռուսաստանի հետ առճակատման խորացման մեջ, եւ առայժմ չի երեւում, թե երբ եւ որտեղ ողջախոհությունը կգերակշռի: Այսօր ՆԱՏՕ-Ռուսաստան փոխհարաբերությունների արտառոց բնույթը ամենից լավ է հիշեցնում «սովորական» իրավիճակը, որի (սառը պատերազմի) պայմաններում ստեղծվեց ՆԱՏՕ-ն», հայտարարել է Գրուշկոն:
Նրա խոսքերով, Ռուսաստանի եւ ՆԱՏՕ-ի փոխհարաբերություներում ներկայումս գոյություն ունեցող ճգնաժամը ամենատեւականն է պատմության մեջ: Ըստ որում, ՆԱՏՕ-ի քաղաքական խորհրդի շրջանակներում երկխոսությունը շարունակվում է, թեեւ 2019 թ. հունվարին տեղի ունեցած խորհրդի վերջին նիստը որեւէ գործնական արդյունքի չհանգեցրեց: Փոխարտգործնախարարի խոսքերով, Ռուսաստանը բացասաբար է վերաբերվում Սեւ ծովում ՆԱՏՕ-ի ռազմական ակտիվության ընդլանմանը: Վերջինս չի նպաստում տարածաշրջանի անվտանգությանը, այլ միայն ապակայունացնում է այն:
Միեւնույն ժամանակ, Գրուշկոն ընգծել է, որ ՆԱՏՕ-ի հետ ռազմական հակամարտություն չի սպասվում, քանի որ դա աղետ կլիներ ամբողջ մարդկության համար:
Մարտի վերջերին Գրուշկոն տեղեկացրել էր Ռուսաստանի սահմանների մոտ ՆԱՏՕ-ի ակտիվացման մասին: «Մտացածին ռուսական սպառնալիքի պատրվակով ՆԱՏՕ-ն ուժեղացնում է իր ռազմական ներկայությունը Արեւելյան Եվրոպայում, ռազմականացնում Սեւծովյան տարածաշրջանը, ակտիվացնում հետախուզական գործունեությունը ՌԴ սահմանների երկայնքով: Բացի դրանից, դաշինքի քաղաքականությունն ազդում է Եվրոատլանտյան տարածշրջանի կայունության վրա», ասել է Գրուշկոն ՌԻԱ գործակալության թղթակցին:
