Հնդկաստանի Ստորին Ասսամ նահանգի Դհուբրի նավահանգստային քաղաքի մշակութային ժառանգության պահպանման հարցերով զբաղվող մասնագետների շրջանում վերջերս հետաքրքրությունը վերստին բորբոքվել է այնտեղ գտնվող հայկական հինավուրց եկեղեցու վերաբերյալ: «The Telegraph» հնդկական թերթի լրագրող Գաուրավ Դաշը գրում է, որ մինչ օրս ենթադրվում էր, որ նախագաղութային ժամանակաշրջանում հայերը հիմնականում Բենգալիայում, Կերալայում եւ Կալկաթայում էին նշանակալի ներկայություն ներկայացնում: «Ասսամի հայկական եկեղեցին նոր լույս է սփռում: Մենք պետք է փաստագրական տվյալներով պարզենք, թե Դհուբրիում նրանք ինչ ազդեցություն են ունեցել:
Եկեղեցու ճարտարապետությունը եզակի խառնուրդ է հայկական եւ ասսամական ոճի կառուցվածքների: Ունի 3 կամարաձեւ ապակե պատուհաններ եւ 1 կենտրոնական եռանկյունաձեւ գմբեթ: Առանձնանում է այլ, բրիտանական ոճի կառույցներից», ասում է Զայանտա Շարման ՙ «Ասսամի ժառանգության պահպանման ընկերության» (ԱԺՊԸ) քարտուղարը:
ԱԺՊԸ-ն պաշտոնապես գրանցված ընկերություն է, որն զբաղվում է մասնավորապես նախագաղութային Հնդկաստանի կառույցների պահպանման հարցերով: Վերջերս ընկերությունը եկեղեցու նկարը տարածել է փորձագետների շրջանումՙ հետաքրքրություն առաջացնելով նաեւ տեղացիների մոտ: Գրող, շրջանի սոցիալ-տնտեսական եւ մշակութային կյանքին լավ ծանոթ ութսունամյա Ս.Կ.Բոսեն պատմել է եկեղեցուց մոտ 50 մետր հեռավորության վրա գտնվող գերեզմանատան մասին: «Լավ հիշում եմ, որ այնտեղ 12-15 գերեզման կար, որ հայերին էր պատկանում: Դա նշանակում է, որ հայերը նաեւ այստեղ կարեւոր ներկայություն են ունեցել: Նրանք առեւտրականներ էին, որոնք հավանաբար 18-րդ դարի վերջերին էին հաստատվել այստեղ: Գերեզմանն այժմ գոյություն չունի: Արդի կառույցները հիմա գերիշխում են: Միայն հին արձանագրությունները կարող են ճշգրիտ տվյալներ հայթայթել, որից հետո պետք է մտածել, թե ինչպես վերականգնել եւ ապագա սերունդներին հանձնել այս հայկական եկեղեցին, որ բրիտանացիները վերածել էին ակումբի: Հետանկախության տարիներին այն հայտնի էր որպես «Կանանց ակումբ», ասել է նա:
