Անցնող շաբաթ Թեհրանում կայացավ Ռոհանի-Պուտին-Ալիեւ եռակողմ հանդիպումը, որին նախորդել էին Ռոհանի-Պուտին եւ Ռոհանի-Ալիեւ երկկողմ հանդիպումները. Պուտին-Ալիեւ հանդիպում Թեհրանում չի եղել: Ու չնայած ՌԴ նախագահի մամուլի խոսնակ Դմիտրի Պեսկովը, նախքան հանդիպումը նշել էր, որ «երեք նախագահները քննարկելու են էներգետիկ գործակցությունը, Ռոհանի-Պուտին-Ալիեւ համատեղ հայտարարության տեքստում կարդում ենք. «Կողմերն ընդունում են, որ տարածաշրջանում չկարգավորված հակամարտությունները զգալի խոչընդոտ են տարածաշրջանային համագործակցության համար, եւ այդ առնչությամբ ընդգծում են միջազգային իրավունքի սկզբունքների եւ նորմերի ու դրանց համապատասխան ընդունված որոշումների ու փաստաթղթերի հիման վրա բանակցությունների միջոցով շուտափույթ խաղաղ կարգավորման կարեւորությունը»:
Իմիջիայլոց, Թեհրանը հայտարարել է, որ Իրան-Ադրբեջան-Ռուսաստան երկաթգծի իր հատվածում շինարարությունն ավարտվել է, իսկ ՀՀ տրանսպորտի նախարարն ասել է, որ Հայաստան-Իրան երկաթգծի կառուցման հետ կապված «աշխատանքներն ընթանում են»: Մոսկվան, Թեհրանը եւ Բաքուն որոշել են նաեւ Հյուսիս-Հարավՙ մեզ համար շատ խորհրդանշական անվանումով միջպետական ճանապարհ կառուցել: Բայց մի լավ բան էլ, Ադրբեջանը, պարզվում է, տեւական ժամանակ է, որ ցանկանում է Իրանից հրթիռներ գնել, ու չի գնում, քանի որ Իրանը հրաժարվում է դրանք վաճառել Բաքվին: Պատկերացնո՞ւմ եք, թե որքան է զարմացել Պուտինը, երբ նրան պատմել են այս մասին:
