Մյունխենից արձագանք ենք սպասում ուշ երեկոյան ավարտվեց նաեւ Նալբանդյան-Մամեդյարով հանդիպումը

Անահիտ Հովսեփյան, Գերմանիա

Փետրվարի 16- ի հետմիջօրեին Մյունխենում, ուր 17- 19- ին ընթանում է անվտանգության ամենամյա գագաթնաժողովը, հանդիպում է կայացել ՀՀ արտգործնախարար Նալբանդյանի եւ Մինսկի խմբի համանախագահներ Իգոր Պոպովի, Ստեֆան Վիսկոնտիի, Ռիչարդ Հոգլանդի, ինչպես նաեւ ԵԱՀԿ գործող նախագահի անձնական ներկայացուցիչ դեսպան Անջեյ Կասպրչիկի միջեւ։ Ըստ նախարարության տարածած հաղորդագրության,նախարարը զրուցակիցների ուշադրությանն է ներկայացրել այն փաստը, որ ի հեճուկս համանախագահ երկրների պահանջների, Ադրբեջանը շարունակում է խախտել 1994-95-ին զինադադարի եռակողմ անժամկետ համաձայնագրերըՙ խնդիրը ռազմական ճանապարհով լուծելու սպառնալիքներով։ «Նախարարի փաստերին համանախագահներն ինչպե՞ս արձագանքեցին», մեր հեռախոսային հարցմանն ի պատասխան ԱԳՆ մամլո խոսնակ Տիգրան Բալայանն այսպես պատասխանեցՙ «եթե հրապարակելու լինեինք, կգրեինք։ Հետեւեք զարգացումներին»։Ավելի ուշՙ տեղական ժամանակով 20 անց 30- ին ավարտվեց նաեւ Նալբանդյան-Մամեդյարով-համանախագահներ ձեւաչափով հանդիպումը։