Չեննայի (Հնդկաստան) 1712-ին կառուցված հայկական եկեղեցին, որը բազմաթիվ փոթորիկներ եւ գրոհներ էր դիմակայել դարեր շարունակ, այժմ Վարդահ ցիկլոնի հետեւանքով կանգնել է կործանման եզրին, տեղեկացնում է «Time of India» պարբերականը:
Անբավարար նյութական միջոցների եւ հանրային ուշադրության պակասի հետեւանքով ուղենշային այս հուշարձան-կառույցի որոշ մասեր, ինչպես օրինակ հրաշակերտ զանգակատունը, որ 6 հսկայական զանգեր է ընդգրկում իր մեջ, լուրջ վերանորոգման կարիքն ունի: Պատերը ճաքճքած են, ծեփը ամբողջովին թափված: Վերջին տարիներին ծիսակատարությունները հազվադեպ երեւույթներ էին դարձել եկեղեցում, որտեղ ծննդյան տոներին մի քահանա էր գալիս Կալկաթայից պատարագ մատուցելու: Կառույցը գտնվում է Պարիսի շրջանում, որտեղ «Հայկական փողոցի» երկայնքով բանկեր են, հարուստ խանութներ, ճաշարաններ եւ այլ հաստատություններ: Եկեղեցու բակում շուրջ 350 գերեզմաններ են: Չեննային հարուստ է իր մշակութային բազմազանությամբ: Այնտեղ կարելի է տեսնել կաթոլիկական, բողոքական եւ առաքելական եկեղեցիների շրջապատում նաեւ մահմեդական մզկիթներ: Հաշվի առնելով իր ամուր հիմքերը կարելի է ենթադրել, որ վերանորոգման ենթարկվելուց հետո այն դեռ երկար կարող է ծառայել հավատացյալներին», գրում է թերթը:
