«ՄԱՀՄԵԴԱԿԱՆՆԵՐԸ ԳԵՐՄԱՆԻԱՅԻ ՄԱՍ ԵՆ, ԻՍԼԱՄԸՙ ՈՉ »

ԱՆ. Հ.

Բունդեսթագի քրիստոնյա դեմոկրատական – քրիստոնյա սոցիալիստական միության խմբակցության ղեկավար Ֆոլկեր Քաուդերը վերաձեւակերպել է Գերմանիայում օրերս աջերիՙ «Այլընտրանք Գերմանիայի համար շարժման» առաջնորդների ելույթներից նոր արդիականություն գտած, ԳԴՀ նախկին նախագահ Վուլֆիՙ «Իսլամը պատկանում է Գերմանիային» արտահայտությանն իր հակաճառություննՙ ասելովՙ «մահմեդականները պատկանում են Գերմանիային, իսլամըՙ ոչ»: «Դեր թագեսշպիգելի» հաղորդմամբ, Քաուդերը պարզաբանել է, որ նախՙ «իսլամը պատմականորեն եւ մշակութաբանական տեսակետից Գերմանիայի վրա իր դրոշմը չի թողել» եւ նաեւՙ որ «իսլամը բազմաշերտ է եւ դրա մեջ կան ուղղություններ, որ մենք Գերմանիայում երբեւէ ընդունել չենք կարող»: Խմբակցության ղեկավարը նշել է նաեւ, որ մահմեդականների իրավունքները Գերմանիայում չեն սահմանափակվում եւ նրանք իրավունք ունեն ուրիշ հավատացյալների նման օգտվել իրենց տրված կրոնական ազատություններից, մզկիթ ու մինարեթ կառուցելՙ չմոռանալով սակայն, որ ԳԴՀ- ում կրոնը պետությունից վեր չէ: