Ամերիկյան National Interest թերթը եվրոպացիներին հորդորում է ձեռնպահ մնալ Անկարայի հետ հախուռն գործակցությունից: «Եվրոպան պետք է զգուշանա Թուրքիայի հետ համատեղ ձեռնարկումներից, որոնք սպառնում են վտանգել Եվրոմիության հիմքը կազմող սկզբունքները: Զարմանալի է, թե ճգնաժամի պայմաններում ԵՄ-ը ինչպիսի երեսպաշտությամբ կարողացավ աչք փակել Անկարայի բազմաթիվ իրավախախտումների վրա եւ ընդառաջել Էրդողանի պահանջներին», գրում է թերթը:
Նշվում է, որ Սիրիայում ահաբեկիչներին զինելու փաստերը եւ իսլամիստների նավթի հետ կապված մեքենայությունները կասկածներ են հարուցում, թե Թուրքիան կարող է ինչ-որ մեկին օգնել հակաահաբեկչական պայքարում: Եթե Եվրոպան Էրդողանի հետ համագործակցելու հույսեր է փայփայում, ապա պետք է գիտակցի նրա «օգնության» անչափ բարձր գինը, ընդգծում է հրատարակությունը: Զանգվածային ներգաղթի դեմ պայքարի միջոցառումների համաձայնագիրը, որի շրջանակներում ԵՄ-ը Անկարային երեք միլիարդ եվրո է հատկացնելու, լոկ խրախուսում է թուրք նախագահի շահամոլությունը:
Իր հրապարակման վերջում National Interest-ը հիշեցնում է Եվրոպայի խորհրդի նախագահ Դոնալդ Տուսկի այն խոսքերը, թե Եվրոպան ստիպված կլինի գործարք կնքել այն երկրի հետ, որի սկզբունքներն ու նպատակները դարեր շարունակ լրջորեն տարբերվել են եվրոպականներից:
