Հայ ազգի մեծագույն երախտավորներից Սուրբ Մեսրոպ Մաշտոցի ծննդյան 1650-ամյակը մեծ ոգեւորությամբ եւ հանդիսավոր պայմաններում նշվել է Կալիֆոռնիայում: Ըստ խմբագրությանը հասցեագրված հաղորդագրությանՙ հոկտեմբերի 26-ին Վուդբերի համալսարանի (Բըրբենկ) Ֆլետչեր Ջոնս դահլիճում տեղի է ունեցել ակադեմիական գիտաժողովՙ կազմակերպության ՀԲԸՄ-ի, Արարատ-Էսքիճյան թանգարանի, Համազգային կրթական եւ մշակութային ընկերության, «Նոր սերունդ» եւ Ստամբուլահայ մշակութային կազմակերպությունների:
Գիտաժողովին մասնակցել են պրոֆ. հայր Լեւոն Հայրապետյանը, դոկտ. Աբել Մանուկյանը, դոկտ. Երվանդ Զորյանը, պրոֆ. Հակոբ Գյուլուջյանը եւ պրոֆ. Ռոբերտ Հյուսենը: Քննարկվել են նոր աշխարհաքաղաքական պայմաններում մարտահրավերներին դիմակայելու խնդիրները:
Իսկ դրանից առաջՙ սեպտեմբերի 13-ին, ըստ «Նոր օրի», Գլենդեյլի հանրային գրադարանի դահլիճում տեղի են ունեցել տոնահանդես եւ հյուրասիրություն գեղարվեստական ճոխ հայտագրով, մասնակցել են պրոֆ. Արտեմ Սարգսյանը, բանաստեղծ Գեւորգ Քրիստինյանը, Հովսեփ Նալբանդյանը, դոկտ. Կարպիս Տեր-Եղիայանը:
Հանդիսավարն է եղել Անահիտ Իշխանյանը:
