Նիկոլ Փաշինյանի կաբինետի ներկայացուցիչների մի մասը մաթեմատիկական տարրական հաշվարկներ կատարել չի կարողանում: Արարատի նախկին մարզպետ Գարիկ Սարգսյանի 40 ու 40 հազար հետկտարի հայտնի պատմությունից հետո այժմ էլ Երեւանի քաղաքապետի աթոռին հայտնվելու անսանձ ցանկություն ունեցող Տիգրան Ավինյանն է գյուտ արել: Պարոն փոխքաղաքապետը ՀՀ «հպարտ ու արժանապատիվ» քաղաքացիներին շտապել է տեղեկացնել, որ 48 ամսից Երեւանի Մետրոպոլիտենի նոր կայարանը պատրաստ կլինի: Հստակեցրել է՝ այսինքն երկու տարուց: Ավինյանի թույլ տված սխալը միայն ժամեր անց կառավարությունից են շտկել ու բացատրել՝ շփոթմունք է եղել: Փաշինյանի իշխանության համար ասես նորմա է՝ ոտքի վրա սխալներ թույլ տալ, ապա դրանք ընդհուպ մի քանի անգամ շտկել ու ասել՝ շփոթմունք է եղել: Շփոթմունքի տրամաբանությունից է բխում, երեւի, Տիգրան Ավինյանի մեկ այլ խոստում, թե այս տարվա մարտի մեկից նոր տեսակի ավտոբուսներ են շահագործվելու: Այսօր արդեն մարտի երեքն է, բայց փոխքաղաքապետը չի էլ շտապում պարզաբանել՝ ո՞ւր մնացին գերմանական «MAN» մակնիշի ավտոբուսները:
Նույն տրաբանությամբ ու առանց ամոթի զգացումի՝ Փաշինյանն ու թիմակիցները, կառավարության կաբինետում տեղավորվելուց հետո, պատեհ ու անպատեհ առիթներով հայտարարում են, թե Մետրոպոլիտենի նոր կայարանը շուտով կշահագործվի: Շուտովը 4 տարի է, իսկ այժմ, փաստորեն, որոշել են փոքր-ինչ ավելի երկարաժամկետ կտրվածքով ստել մարդկանց:
Քաղաքապետարանի նախկին մեկ այլ պաշտոնյա էլ, որ բավական հաջողած երգահան է, իր արեւով էր երդվում, թե դեպի Նորքի զանգվածներ տանող ճոպանուղին կշահագործվի: Ճոպանուղու մասին սին խոստումների հակառակ կողմը սակայն այն է, որ երեւանցիները Մյասնիկյան փողոցում ժամերով խցանումների մեջ են մնում:
ՍԵՎԱԿ ՎԱՐԴՈՒՄՅԱՆ
