Ֆրանսիական «Պրես դը լա սիտե» հրատարակչությունը վերջերս լույս է ընծայել ֆրանսագիր հայազգի գրող Կորին Զարզավաթճյանի «Ռոզը Դիարբեքիրից» վեպը: Սա մի ճամփորդություն է դեպի հայ ընտանիքի սիրտը եւ պատմությունը մի երիտասարդ աղջկա, որն ունի մի կիրք՝ թատրոնը եւ մեկ երազանք՝ հանդիպել ֆրանսիացի հռչակավոր դերասանուհի Սառա Բեռնարին: Սակայն մենք գտնվում ենք 1894 թվականի Օսմանյան կայսրության մի նահանգում, որտեղ ազատության երազանքները դժվար է իրականացնել, հատկապես կնոջ համար: Դիարբեքիրում Հակոբյանների ընտանիքն ապրում է ավանդույթի եւ արդիականության միջեւ: Մինչ ավագ եղբայրները ուսման են մեկնում Եվրոպա, ընտանիքի կրտսեր զավակին՝ ջերմեռանդ ու վճռական Ռոզին, ի վերջո հաջողվում է հասնել Կոստանդնուպոլիս եւ տեսնել հյուրախաղերի եկած «Աստվածային Սառայի» խաղարկությունը: Ֆրանսիական մշակույթի երկրպագու Ռոզը, թվում է, շատ մոտ է իր երազանքների իրականացմանը, բայց «Կարմիր սուլթանի»՝ Աբդուլ Համիդ 2-րդի հայահալած քաղաքականությունը նոր խնդիրներ է բացում երիտասարդ աղջկա առաջ…
Ըստ վեպի ծանուցման՝ «Ռոզը Դիարբեքիրից» վեպը վկայում է բացառիկ կանանց խիզախության եւ ըմբոստության մասին, ներկայացնում է հայ ժողովրդի պատմության քիչ ծանոթ էջերից մեկը եւ հարգանքի տուրք մատուցում 19-րդ դարավերջին ի նպաստ հայության գործած ֆրանսիացի անհատականություններին: «Մի ընտանեկան որմնանկար՝ արեւելյան զգացողությամբ, ողբերգական եւ միաժամանակ՝ շռայլ»:
Կորին Զարզավաթճյանը գրող եւ դերասանուհի է: Մինչ «Ռոզը Դիարբեքիրից» վեպը նա եղբոր՝ Ռիշար Զարզավաթճյանի հետ համահեղինակել է «Հայկական խոհանոց» (2017, առաջաբանը՝ ճանաչված երաժիշտ Անդրե Մանուկյանի) եւ «Հայաստանը եւ հայերը A-ից մինչև Z» (2020) հատորները:
Ա. Բ.
