Էվոլյուցիա
Մարդը, որ արարչագործության թագն ու պսակն է, Արարչի մյուս ստեղծագործություններից տարբերվում է խոսելու, մտածելու եւ դատողություններ անելու կարողություններով:
Արարչի թագն ու պսակը նաեւ մյուս արարածներից տարբերվում է ամոթի զգացումով, որից դրդված էլ հանդերձավորվել է:
Առաջինը Ադամն ու Եվան են նկատել իրենց մերկությունն ու թզենու տերեւներից ամոթույքը ծածկող միջոց պատրաստել:
Դրախտից վտարված զույգի ժառանգները, ամոթից բացի, նաեւ եղանակային անբարենպաստ պայմաններին դիմակայելու պարտադրանքով՝ սկսեցին իրենց մարմինը քողարկել վագրենիով ու այծենիով, նաեւ շրջապատի մյուս կենդանիների մորթիներով:
Հետագայում Արարչի թագն ու պսակը համարվող մարդը, չար ուժերից ու սատանաներից պաշտպանվելու համար, հորինեց հոգեւորականի գորշ սքեմը՝ պատմուճանն ու պարեգոտը ներառյալ:
Հագուկապի էվոլյուցիայի որոշակի հանգրվանում, մարդն իր անվտանգությունն ապահովագրելու մղումով, իր մարմնի խոցելի հատվածները պաշտպանելու համար հեղինակեց զրահը՝ զրահաբաճկոնն ու սաղավարտը ներառյալ:
Հանդերձանքի էվոլյուցիայի ուղին անշեղորեն ապահովելու հաստատակամությամբ տոգորված մարդն ասպարեզ հանեց զինվորական, դպրոցական, սպորտային, բանվորական, բժշկական ու այլ կարգի համազգեստներ, նաեւ ավելի շատ հմտացավ նորաձեւության պահանջների բավարարման գործի մեջ ու ստեղծեց մոդայիկ հագուստի լայն տեսականի:
Սակայն հագուկապի էվոլյուցիոն զարգացման ամենաբարդ հանգրվաններից մեկում հայկական իրականության մեջ հայտնվեց մեկը, ով անտեսելով իր ամոթի ու պատկառանքի պարտադրանքը, աչքաթող անելով չար ուժերից ու սատանաներից ապահովագրվելու մղումները, ասպարեզ հանեց Դեդոյի վաստակով ու Բաբոյի ձեռքով գործված մեր թշնամու զայրույթը հարուցող կարմիր շորից հրաժարվելու թեզը:
ԳՐԻԳՈՐ ԱՌԱՔԵԼՅԱՆ
