Այնտեղ կռվում են 70 երկրից եկած 11 հազար սուննի եւ 5 հազար շիա
Սիրիայի քաղաքացիական պատերազմը հետզհետե ավելի մեծ ազդեցություն է գործում իսլամական աշխարհի վրա: Դրա դրսեւորումներից մեկը դարձել է իրադրության ապակայունացումը հարեւան Լիբանանում եւ Իրաքում: Սակայն, ինչպես նշում են փորձագետները, Սիրիայի տարածքն էլ աստիճանաբար վերածվում է տարբեր երկրներից եկած սուննի եւ շիա գրոհայինների բախումների մարտադաշտի:
Լոնդոնի թագավորական քոլեջին առընթեր Արմատականության ուսումնասիրման միջազգային կենտրոնի գնահատմամբ, քաղաքացիական պատերազմի երկուսուկես տարվա ընթացքում 11 հազար սուննի գրոհայիններ արտերկրներից Սիրիա են եկել նախագահ Բաշար Ասադի վարչակազմի դեմ կռվելու նպատակով:
Նրանց 70 տոկոսը եկել է մերձավորարեւելյան ուրիշ երկրներից, 18 տոկոսըՙ Եվրոպայից, հիմնականումՙ Ֆրանսիայից եւ Մեծ Բրիտանիայից: Սուննի խմբավորումների մեծ մասը կապված է «Ալ Ղաիդայի» հետ: Այդ խմբավորումների շարքերում կռվում են ընդհանուր առմամբ 70 երկրների ներկայացուցիչներ:
Օտարերկրացիներից ոմանք էլ կռվում են Բաշար Ասադի կողմնակիցների շարքերում: «Ամերիկայի ձայն» ռադիոկայանի տվյալներով, ներկայումս Սիրիայում կան հազարավոր շիա գրոհայիններ: Նրանց նշանակալի մասը լիբանանյան «Հզբոլլահ» շարժման ակտիվիստներ են, որոնք վճռական դեր են խաղում Դամասկոսը Լաթաքիային կապող Կալամուն լեռնային շրջանի համար մղվող մարտերում:
Սիրիայի հակամարտության մասնակիցների մեջ հետզհետե ավելանում է շիա իրաքցիների թիվը: Վերլուծաբանների կարծիքով, նրանք արդեն 5 հազարից ավելի են: Շիա գրոհայինների ներգրավմանը նպաստել է շիա իրաքցիների առաջնորդ Մուքթադա Սադրի հոգեւոր ուսուցիչ, իրանցի այաթոլլահ Քազիմ ալ Խայերիի հրապարակած կոչը: Փորձագետները նշում են, որ Սիրիայի վարչակարգը առանց իրանցիների օգնության չէր կարողանա վերստին տիրել ռազմավարական նախաձեռնությանը: Իրանը ոչ միայն համախմբել է իր շիա դաշնակիցներին, այլեւ Սիրիա է գործուղել իրանցի զինվորական խորհրդատուների: Շիա գրոհայինները ղեկավարվում են ոչ թե Դամասկոսի, այլ Թեհրանի ցուցումներով:
