Արդեն որերորդ տարին աշունն իր հետ բերում է Կինոաշունը, եղանակ, որը լցվում է կինոյի գույներով: Հոկտեմբերի 1-ից մեկնարկել է հայկական ազգային կինոյի մեկամսյակը ինչպես մարզերում ու զորամասերում, այնպես էլ Երեւան քաղաքի բոլոր համայնքներում, դպրոցներում ու բարձրագույն ուսումնական հաստատություններում: Մինչեւ նոյեմբերի 4-ը կցուցադրվեն հայկական հին ու նոր ֆիլմեր, հանդիպումներՙ կինոգործիչների հետ, հոբելյանական երեկոներ:
«Կինոաշնան» շնորհիվ մարզերում եւս կակտիվանա մշակութային կյանքը, քանզի բնակչությունը գրեթե ամեն ինչից կտրված է եւ այս փառատոնը հնարավորություն է ընձեռում հաղորդակից լինել մշակույթին, տեղեկանալ նոր ֆիլմերի մասին եւ ապահովել ժամանցը:
Ինչպես անցյալ տարի, այս տարի եւս «Կինոաշուն» ծրագրի կինոնկարները կցուցադրվեն Երեւանի պետական համալսարանում, Խ. Աբովյանի անվ. պետական մանկավարժական համալսարանում, Թատրոնի եւ կինոյի պետական ինստիտուտում, Հայ-ռուսական (Սլավոնական) համալսարանում: Փառատոնին միացել է նաեւ Երեւանի մշակույթի պետական քոլեջը:
Հոբելյանական երեկոների պակաս այս տարի եւս չի լինի, կնշվեն կինոօպերատոր Ալբերտ Յավուրյանի 80-ամյակը, Գրիգոր Մելիք-Ավագյանի ու Աղասի Այվազյանի 90-ամյակները եւ կլինի նաեւ Հենրիկ Մալյանի 90-ամյակին նվիրված հուշ-երեկոն:
Ծրագիրը մեծ տեղ է հատկացնում նաեւ ՀՀ զորամասերին ու սահմանապահ համայնքների գյուղերին, որտեղ կցուցադրվեն ռազմահայրենասիրական բնույթի կինոնկարներ. Ջիվան Ավետիսյանի «Թեւանիկը», Արտակ Զիլֆիմյանի «Չեզոք գոտին», Հրաչ Քեշիշյանի «Գարեգին Նժդեհը», որոնք նույնպես կցուցադրվեն ՀՀ զորամասերում եւ սահմանային գյուղերում:
«Կինոաշուն» ծրագրի առանցքում է նաեւ Հայոց ցեղասպանության թեման եւ այս տարվա ծրագրի հիմնական 2-րդ ուղղվածությունն է հանրահռչակել Հայոց ցեղասպանության թեմայով նկարահանված ֆիլմերը, հատկապես դրանք, որոնք ստեղծվել են վերջին տարիներին. Ռոբեր Կետիկյանի «Մի խելագարի պատմությունը», Հրանտ Հակոբյանի «Հանդիպումը», Կարին Հովհաննիսյանի «1915»-ը, Ռուբեն Քոչարի «Հայերի ընկերները», Ա. Իգիթյանի եւ Վ. Ստեփանյանի «Վանա ծովուն արշալույսը», չեխական հեռուստատեսության համար նկարահանված Մարտին Մահդալի «Ցեղասպանության հավերժական վիշտը», Արամ Շահբազյանի «Փրկության քարտեզը», Արա Երնջակյանի «Խավարումը», Վիգեն Չալդրանյանի «Ապրիլը», Արթուր Սուքիասյանի «Մեր Ատլանտիդան» եւ այլ ժապավեններ, որոնք ընդգրկված են Կինոաշնան այս բաժնում:
Փառատոնը կամփոփվի նոյեմբերի 4-ին, եւ այդ առթիվ կհայտարարվեն նաեւ ուսանողների համար կազմակերպվող գրախոսականների մրցույթի արդյունքները:
