ԵՐՎԱՆԴ ՀԱԿՈԲՅԱՆ
Հայաստանի պատանեկան հավաքականը հոկտեմբերի 1-4-ը մասնակցեց Պորտուգալիայում ընթացող Եվրոպայի մինչեւ 17 տարեկանների 2016 թ. առաջնության ընտրական փուլին: Հայաստանի հավաքականն ընդգրկված էր 9-րդ խմբում, որտեղ նրա մրցակիցներն էին Պորտուգալիայի, Անգլիայի եւ Սան-Մարինոյի պատանեկան հավաքականները: Մեր հավաքականը անցկացրած 3 խաղերից վաստակեց ընդամենը մեկ միավոր: Պատանի հայ ֆուտբոլիստները առաջին խաղում խոշոր 7:0 հաշվով պարտվեցին Պորտուգալիային: Հաջորդ խաղում Տիգրան Պետրոսյանցի սաները 5 անպատասխան գնդակ ընդունեցին Անգլիայի հավաքականից, իսկ վերջին տուրում ոչ-ոքի խաղացին Սան-Մարինոյի հետ եւ խմբում գրավելով 3-րդ տեղըՙ դուրս մնացին հետագա պայքարից:
Հայաստանի տարբեր տարիքային հավաքականներն իրենց ելույթներով ցույց են տալիս, որ հայկական ֆուտբոլի ապագան, մեղմ ասած, անհուսալի ձեռքերում է: Սա թերեւս վերաբերում է նաեւ ազգային հավաքականին:
Սեպտեմբերի 24-ին Հանրապետական մարզադաշտում տեղի ունեցավ Հակոբ Տոնոյանի անվան սուպերգավաթի հանդիպումը: Պատվավոր գավաթը խաղարկեցին Երեւանյան 2 թիմերը «Միկան» ու «Փյունիկը»: Պատվավոր բառն այս պարագայում ամբողջովին արժեզրկվում է, քանի որ սուպերգավաթային հանդիպումն իր հետաքրքրությունն ամբողջովին կորցրել էր ոչ միայն երկրպագուների, այլ պետք է փաստելՙ նաեւ ֆուտբոլիստների ու մարզիչների համար: Հայկական ֆուտբոլն առաջընթաց ապրելու փոխարեն նահանջում է, այն էլ արագ տեմպերով:
Ընդհանրապես, ֆուտբոլային Եվրոպայում նման կարեւոր հանդիպումներից օրեր առաջ ֆուտբոլային տրամադրություն է իշխում, փողոցներում գովազդային վահանակների միջոցով հիշեցնում են խաղի մասին, ինչն էլ խթան է հանդիսանում երկրպագուների ավելի մեծ թվերով մարզադաշտ հաճախելուն: Ճիշտ է, մեր պարագայում ֆուտբոլային տրամադրություն քիչ թե շատ լինում է միայն ազգային հավաքականի հանդիպումների օրերին, սակայն երբ ֆուտբոլային հանրությանը պատշաճ կերպով չի տեղեկացվում հանդիպման մասին, ոգեւորիչ գովազդներ չեն լինում, ապա ավելորդ է խոսել մարզադաշտ հաճախելիության մասին: Հարկ է նշել, որ հայկական ոչ մի հեռուստաընկերություն հանդիպումը չցուցադրեց:
Անդրադառնալով սուպերգավաթային մրցավեճին պետք է նշել, որ խաղի կարեւորությունն այնքան քիչ էր, որ թիմերը խաղադաշտ էին դուրս եկել գրեթե 2-րդ կազմերով: Ինչեւիցե, «Փյունիկը» հաղթեց, եւ նույնիսկ պարգեւատրման արարողության ժամանակ չզգացվեց սուպերգավաթային հանդիպման «համն ու հոտը»: Գավաթը հանձնվեց հաղթող թիմին ու րոպեներ անց թիմերը հեռացան խաղադաշտից: Նույնիսկ ավանդական դարձած հրավառությունն ու մարզադաշտի շուրջ հաղթական վազքը այս անգամ բացակայում էին:
Հետաքրքրաշարժ է, որ «Փյունիկի» գլխավոր մարզիչ Սարգիս Հովսեփյանը լրագրողների հետ զրույցում խոսելով սուպերգավաթային մրցավեճում 2-րդ կազմ դուրս բերելու մասին ասել էր հետեւյալը. «Չէի ասի, թե հետաքրքրությունը ցածր է սուպերգավաթի հանդիպման նկատմամբ: Գործի մեջ տեսանք պատանիներին: Ուրախանում եմ, որ այդ խաղին կարող ենք պատանիներին տեսնել գործի մեջ: Այդ խաղին տեսա հայկական ֆուտբոլի ապագան, այդ երիտասարդները հետագայում կարող են ընդգրկվել ազգային հավաքականներում:
Դժվար է ասել, թե ինչ ապագա է տեսնում Սարգիս Հովսեփյանը, բայց փաստ է, որ հայկական ֆուտբոլը` մասնավորապես ներքին առաջնությունը գտնվում է անդունդի եզրին: Նախորդ մրցաշրջանից առաջ քիչ էր մնում բարձրագույն խմբին հրաժեշտ տար մասնակից 8 թիմերից մեկը` «Ուլիսը», սակայն վերջին պահին թիմը նոր սեփականատերեր ձեռք բերեց: Այս տարի նույն խնդրին բախվեց արդեն «Միկան» եւ խնդիրը նույն լուծումը ստացավ:
Վերջերս հայկական ֆուտբոլը հերթական ծանր հարվածը ստացավ: Բարձրագույն խմբի մասնակից Երեւանի «Արարատը», որն իր տնային հանդիպումներն անցկացնում էր Հրազդան մարզադաշտում, այսուհետ հանդես կգա Վազգեն Սարգսյանի անվան հանրապետական մարզադաշտում, քանի որ Հրազդանը սնանկ է ճանաչվել: Տեսնենք, թե ինչ հանգուցալուծում կստանա խնդիրը: Ցավալի է, որ մեր ֆուտբոլային հպարտություններից մեկն այսօր գտնվում է նման անմխիթար վիճակում եւ հայտնի չէ, թե ինչ ապագա է սպասում նրան:
Հայկական ֆուտբոլում առկա խնդիրների մասին կարելի է խոսել երկար: Առաջիկայում սպասվում է ազգային հավաքականի երկու հանդիպում: Եվրո-2016-ի ընտրական փուլն ամբողջությամբ ձախողած Հայաստանի ազգային հավաքականը կփորձի վերջին 2 խաղերում վերաշահել երկրպագուների վստահությունը: Սարգիս Հովսեփյանի թիմը հոկտեմբերի 8-ին Նիս քաղաքում ընկերական հանդիպում կանցկացնի Ֆրանսիայի ընտրանու հետ, իսկ 3 օր անց, Եվրո-2016-ի ընտրական փուլի վերջին խաղում, Երեւանի «Հանրապետական» մարզադաշտում կմրցի Ալբանիայի հավաքականի հետ:
