Ամերիկյան խոշորագույն ընկերությունները արտերկրում թաքցնում են 2,1 տրիլիոն դոլար: Հարկերից խուսափող գլխավոր կորպորացիան Apple-ն է: Եթե այդ բոլոր փողերը վերադառնային Ամերիկա եւ դրանցից հարկ վճարվեր, ապա ստացված գումարը կբավականացներ Պենտագոնի տարեկան բյուջեին:
ԱՄՆ Հարկային արդարության կենտրոնի եւ Կրթական հիմնադրամի հետազոտական խմբի տնտեսագետների ու վերլուծաբանների անցկացրած հետազոտության մեջ նշվում է, որ 500 խոշորագույն ընկերություններ երկրից դուրս են բերել 2,1 տրիլիոն դոլարի ակտիվներ ու միջոցներ, որպեսզի չվճարեն բարձր հարկեր: Այսպիսով, չի վճարվել մոտավորապես 620 մլրդ դոլար հարկ:
Թաքցված փողերի 2/3-ըՙ 1,4 տրիլիոն դոլար, ընկնում է ամերիկյան 30 խոշորագույն ընկերություններին:
Հետազոտության մեջ ընդգծվում է, որ արտերկրում թաքցվող գումարը կարող է էլ ավելի մեծ լինել, քանի որ տնտեսագետներն օգտագործել են Արժեթղթերի եւ սակարանների հանձնաժողովին (SEC) հենց ընկերությունների ներկայացրած հաշվետվությունները:
Փողերը թաքցվում են Իռլանդիայում, Բերմուդներում, Լյուքսեմբուրգում, Հոլանդիայում եւ այլ երկրներում գործող դուստր ձեռնարկությունների միջոցով:
Տվյալ երեւույթը լայնորեն տարածված է: Օֆշորային տարածքներում փողերը պահում է ամերիկյան եւ համաշխարհային բիզնեսի սերուցքը կազմող ընկերությունների 3/4-ը, որոնք մտնում են Fortune հանդեսի կազմած աշխարհի 500 խոշորագույն ընկերությունների ցանկի մեջ: Դրանց 72 տոկոսը ունի դուստր ձեռնարկություններ:
Օֆշորներում կորպորատիվ շահութահարկը կազմում է 6 տոկոս, իսկ ԱՄՆ-ումՙ 35 տոկոս: Տարբերությունը շոշափելի է:
Արտերկրում փող թաքցնողների մեջ առաջատարը Apple ընկերությունն է, որ երեք օֆշորներում պահում է 181,5 մլրդ դոլար: Եթե այդ գումարը լիներ Ամերիկայում, վճարվելիք հարկը կկազմեր 59,2 միլիարդ: General Electric-ը 18 օֆշորներում պահում է 119 մլրդ դոլար: Երրորդ տեղում Microsoft ընկերությունն է, որը 5 օֆշորային դուստր ձեռնարկությունների հաշիվներում պահում է 108,3 մլրդ դոլար:
Հետազոտության հեղինակները գտնում են, որ Կոնգրեսը պարտավոր է կորպորացիաներին արգելել օգտվելու օֆշորային տարածքներից: «Դա թույլ կտա վերականգնել մեր հարկային համակարգի բազային արդարությունը, կրճատել պետբյուջեի պակասորդը եւ բարելավել շուկաների աշխատանքը», ընդգծում են նրանք:
