«Հարավային հոսք» գազամուղի նոր տարբերակի համաձայն, նախատեսվում է Ղրիմ թերակղզուց խողովակաշար անցկացնել դեպի բուլղարական Վառնա քաղաք: Այդ մասին հայտարարել է «Գազպրոմ Էքսպորտի» ղեկավարի խորհրդական Անդրեյ Կոնոպլյանիկը: Նա տվյալ գաղափարը հրապարակել է Բրատիսլավայում կայացած կենտրոնաեվրոպական գազային համաժողովում: «Գազպրոմ Էքսպորտի» ներկայացուցչի խոսքերը ռուսական կողմի առաջին խոստովանությունն են առ այն, որ «Հարավային հոսքը» թաղված նախագիծ չէ, արձանագրում է ead/com/ru կայքէջը: Անցյալ տարի ՌԴ նախագահ Վլադիմիր Պուտինը հայտարարել էր, որ այդ նախագիծը մեռյալ է, եւ որ Բուլղարիայի իշխանություններն անատամ են:
«Ռուսաստանն իրավունք ունի նվազագույն վտանգի ենթակա երթուղի փնտրել պայմանագրերի կատարման համար», հայտարարել է Կոնոպլյանիկը: Նա հայտնել է, որ ռուսական կողմը փնտրում է Ուկրաինան շրջանցող եւ Թուրքիան չներառող էներգետիկական երթուղիներ:
«Քննարկվում են «Հարավային հոսքի» եւ «Հյուսիսային հոսք-2»-ի այլընտրական երթուղիներ: Դրանք հարկավոր է կառուցել մասնավորմամբ, այլ ոչ թե Եվրոմիության միջոցներով», պնդում են «Գազպրոմում»:
Այս լուրի հրապարակումից մեկ շաբաթ առաջ Բուլղարիան նավթի ու գազի հետ կապված հետազոտություններ էր սկսել Սեւ ծովում: Ավելի վաղ երկրի վարչապետ Բոյկո Բորիսովը ակնարկել էր, որ ռուս-բուլղարական գազամուղի նախագծի աշխատանքները շարունակվում են, եւ ռուսական կողմն էլ շարունակում է խողովակներ առաքել Բուլղարիա: Սակայն Ղրիմից դեպի Վառնա կառուցվող գազամուղի նախագիծը բարդությունների է բախվում ոչ միայն եվրոպացի կարգավորիչների, այլեւ քաղաքական խնդիրների պատճառով. Բուլղարիան Ղրիմը պաշտոնապես չի ճանաչում իբրեւ Ռուսաստանի մաս:
