Մարսելի հրեական համայնքը մահմեդականների «Ալ Բադր» մշակութային միությանն է վաճառել քաղաքի կենտրոնում գտնվող «Օր Թորա» սինագոգը: Շինությունը կվերածվի մզկիթի, նշում է «Յահու նյուզ» գործակալությունը:
«Վերջին 20 տարում հրեա բնակչությունը տեղափոխվել է քաղաքի ուրիշ շրջաններ: Ես դրականորեն եմ վերաբերվում շինության վաճառքին: Աստված մեկ է բոլորի համար. գլխավորը փոփոխությունների ներդաշնակ ընթացքն է», գործարքի առնչությամբ հայտարարել է Մարսելի Հրեական կոնսիստորիայի առաջնորդ Ցվի Ամմարը:
Մահմեդականների մշակութային միությունը սինագոգը ձեռք է բերել 400 հազար եվրոյով: «Ալ Բադրը» շահագրգռված էր շինության գնմամբ, քանի որ բոլոր հավատացյալները չէին տեղավորվում նույն փողոցում արդեն բացված փոքր մզկիթում:
«Օր Թորան» վերջին տարիներին դատարկ էր: Սինագոգի շենքը կառուցվեց 1960-ականներինՙ այն բանից հետո, երբ բազմաթիվ հրեաներ Ֆրանսիայի հարավ տեղափոխվեցին 1962 թ. այդ երկրից անկախացած Ալժիրից: Ցվի Ամմարի խոսքերով, քաղաքի հրեական համայնքը բարգավաճում է, վերջին երեք տասնամյակներին Մարսելում սինագոգների թիվը 32-ից հասել է 58-ի:
Մահմեդականների համայնքը նաեւ ակնկալում է, որ կկառուցվի դեռ 2001 թ. քաղաքապետի խոստացած գլխավոր մզկիթը: Այդ նախագիծը բախվել էր ֆինանսական դժվարությունների, ինչպես նաեւ աջակողմյան «Ազգային ճակատի» հակազդեցությանը: Շինարարությունը գնահատվում է 23 մլն եվրո:
Մարսելի հրեական համայնքի անդամների թիվը գնահատվում է 70 հազար: Մահմեդականների թիվը երկու միլիոնանոց քաղաքի բնակչության մեջ 220 հազար է, որից 70 հազարը իսլամի ակտիվ հետեւորդներ են:
