«Ռուսաստանի Ջավախքյան Սփյուռք» հասարակական կազմակերպության վարչություն
Արդեն մեկ շաբաթ է, որ ամբողջ հայության ուշադրությունը սեւեռվել է Հայաստանում տեղի ունեցող իրադարձությունների վրա:
Մենքՙ «Ռուսաստանի Ջավախքյան Սփյուռք» հասարակական կազմակերպությունը, կոչ ենք անում ինչպես ՀՀ իշխանություններին, այնպես էլ «Սասնա Ծռեր» խմբին, ինչքան հնարավոր է շուտ անցնել բանակցություններիՙ խուսափելով իրադրության սրումից եւ արյունահեղությունից:
Մենք հարգում ու խոնարհվում ենք Պավլիկի ու նրա ընկերների առջեւ, քանի որ նրանք ժամանակին կռվել են մեզ համար:
Այսօր երկիրը բաժանված է երկու մասի: Մեր ամենամեծ ձեռքբերումն այն է, որ Հայաստանում բարձրացավ հայրենասեր, ուժեղ, հպարտ ու խելացի սերունդ: Այս սերունդը պաշտպանեց Արցախի սահմանները քառօրյա պատերազմի ժամանակ: Եվ ինչպես Մոնթեն է ասել. «Սերունդը պետք է դաստիարակել գաղափարներով, այլ ոչ թե բռնարարքներով:
Ստեղծված իրավիճակը պետք է հաղթահարել ինտելեկտի, արդարության եւ զգոնության միջոցով: Այսօր պետք է հաղթի խոհեմությունը:
Ստեղծված իրավիճակին պետք է լուծում տրվի միմիայն խաղաղ ճանապարհով: Թշնամիներ չկան իրար դեմ կանգնածՙ բոլորս էլ հայեր ենք:
Այս պահին պահանջում ենք, խնդրում, հորդորում երկրի իշխանություններին հանգուցալուծում գտնել առանց բռնության եւ մարդկային կորուստների: Հանգուցալուծել պետականությանը չվնասող զիջումներով:
