Արցախի տնտեսության հետագա զարգացման համար կարեւոր նշանակու-թյուն ունի շնորհալի երեխաներին աջակցելը, ամառային գիտական դպրոցների կազմակերպումը:
2022 թ. հուլիսի 13-18-ը Բյուրականի աստղադիտարանը կազմակերպել էր Բյուրականյան գիտաճամբար Արցախի շնորհալի դպրոցականների համար, իսկ հուլիսի 19-24-ը՝ ամառային դպրոց Արցախի ուսանողների համար:
Յուրաքանչյուր ծրագրում ընդգրկվել են 22 պատանիներ եւ աղջիկներ Արցախի դպրոցներից եւ համալսարաններից: Շուշիի, Մարտակերտի, Պատարայի, Ճարտարի եւ Սարգսաշենի դպրոցներից եկած երեխաները ձեռք բերեցին նոր գիտելիքներ եւ անցկացրեցին հետաքրքիր ժամանակ: Ծրագիրը նպատակ ուներ օժանդակել Արցախում աստղագիտությամբ հետաքրքրվող պատանիների մասնագիտական կողմնորոշմանը, Արցախի պետական համալսարանի ուսանողների ամառային պրակտիկայի բարեհաջող կազմակերպմանը: Այն հնարավորություն տվեց ուսանողներին ծանոթանալու աստղադիտարանի աշխատանքային գործունեությանը, գիտահետազոտական բաժինների աշխատանքներին:
Ճամբարը կազմակերպվել էր Բյուրականի աստղադիտարանի ջանքերով եւ ամերիկահայ աստղագետ Նորա Անդրեասյանի աջակցությամբ:
Աստղադիտարանում օրերն անցնում էին հագեցած մթնոլորտում: Իրականացվում էին աստղագետների կողմից զրույց-դասախոսություններ, գործնական պարապմունքներ: Ամառային դպրոցի մասնակիցները այցելեցին Վ. Համբարձումյանի տուն-թանգարան: Այցելեցին նաեւ Ամբերդ, Տեղերի վանք, Աղձքի հայոց արքաների դամբարան եւ այլն:
Գիտաճամբարի շրջանակներում դպրոցականների համար զրույց-դասախոսություններով հանդես եկան Բյուրականի աստղադիտարանի գիտնականները` «Վիկտոր Համբարձումյանը եւ Բյուրականի աստղադիտարանը», «Տիեզերքի մասին պատկերացումների զարգացումն անտիկ շրջանից մինչեւ մեր օրերը», «Արեգակնային համակարգ», «Հայաստանի սեյսմիկ քարտեզը», «Հայոց նախնյաց աստղագիտական գիտելիքը ժայռապատկերներում», «Աստղերի աշխարհում», «Գալակտիկաների աշխարհում» թեմաներով:
Երեխաները մասնակցեցին նաեւ ռոբոտաշինության դասընթացին,տարբեր մտավոր խաղերի, սովորեցին արձակել հրթիռներ: Երեկոյան ժամերին մասնակցեցին աստղադիտման:
Հարկ է նշել, որ Բյուրականյան միջազգային ամառային դպրոցները անցկացվում են 2006թ.-ից: Մինչ օրս անցկացվել է յոթ ամառային դպրոց՝ 2006, 2008, 2010, 2012, 2016, 2018, 2020թթ:
Ստեփան ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
