Հայաստանի Հանարապետության մոտ երեսուն քաղաքացիներ, առ Ամերիկա հայացք նետելով, SOS են հնչեցնում, թե փրկեցեք մեր հոգիները, ընդունեցեք մեզ օվկիանոսից այն կողմ ու «վայիս» մի եղեք մերՙ Ամերիկայում հայտնվելու երազանքին: Հայ մարդիկ, հավաքվելով Խորհրդային Միության հերոս, ծովակալ Հովհաննես Իսակովի արձանի մոտ, Ամերիկայից պահանջում-խնդրում են հարգել արտագաղթելու սեփական իրավունքը եւ անասաելի մեծ ցանկությունն ու բյուրակրատական քաշքշուքներ չստեղծել Նահանգներ մեկնելու հարցում: Ցույց անելու վայրի ընտրությունն ու օտար պետությունից արտագաղթի հարցում օգնություն աղերսելը, վստահ ենք, մտածված չի այդպես ընտրվել կամ մտածվել, բայց Իսակովի արձանի ներքո Ամերիկային խնդրագին հայացք նետելը, համաձայնեք, խոսուն է:
Երկրից արտագաղթել ցանկացողները փողոց դուրս են եկել «Չենք ուզում կորցնել մեր հնարավորությունը», «Ուզում ենք պայծառ ապագա մեր երեխաների համար», «5 րոպե հարցազրույցը հեռացնում է մեզ մեր երազանքից» ու այլ գրություններով ցուցապաստառներով: Հավաքվածներից շատերը, ի դեպ, լրագրողների հետ չեն շփվել, տեսախցիկներից խուսափելու համար դիմակով ու գլխարկներով են եղել: Ասես իրենց իսկ արածից ամաչել են, իսկ արարքըՙ սեփական երկրից փախչելու համար բացահայտ, օրը ցերեկով ցույց անելը, իհարկե, ամոթ է:
Երեւույթը, ցավոք, նոր չէ: Դեռ մինչեւ պատերազմն էլ Ռուսաստան մեկնել ցանկացողներն էին կառավարության մոտ ցույց անում: Մարդիկ, որ համավարակի ժամանակ հանկարծ հիշել էին Հայաստանի մասին ու որոշել համատարած լոքդաունի ժամանակ մայր հողում հանգրվանել, մի քանի ամիս անց արդեն պահանջում էին իրենց հատուկ ավտոբուս տրամադրել ու ՌԴ ուղարկել: Եթե պետք է, ասում էին, անգամ ՀՀ քաղաքացիությունից կհրաժարվենք, միայն թե Ռուսաստան հասնենք:
Ի դեպ, անցյալ տարի «Գրին քարտ» շահելու համար դիմել է Հայաստանի հանրապետության 160.965 քաղաքացի: Իսկ թե քանի՞ քաղաքացի է «սեւով» արտագաղթում, այդ մասին հայրենի կառավարությունը համեստորեն լռում է:
