Մեր քաղաքական ուժը հայտարարություն է տարածել, որ վերցնելու է մանդատները։ Իմ հարցով դեռ ժամանակ կա, ասել եմ, որ այդ մասին հայտարարությամբ հանդես կգամ։ Մինչ այդ հայտարարությամբ հանդես կգա Գյումրու քաղաքապետը։ Գյումրու ավագանու նսիտից հետո լրագրողներին այս մասին ասաց Գյումրու փոխքաղաքապետ Ավետիս Առաքելյանը։
«Իմ ցանկությունը միակն է, որ ՀՀ-ն րոպե առաջ, օր առաջ միասնական դառնա, ուժեղ դառնա և հզոր դառնա։ Գաղտագողի ոչինչ չենք արել, չենք անելու։ Ինչ անելու ենք՝ բխելու է Գյումրու շահերից։ Մանդատի վերցնելը կոմֆորտից ելնելով չէ. մեր նպատակը միակն է՝ ոչ թե մանդատը կամ քաղաքապետի պաշտոնը, այլ ՀՀ հզորացումը»,- ասաց Ավետիս Առաքելյանը։
Անդրադառնալով Նիկոլ Փաշինյանի այն հայտարարությանը, որ Գյումրիում պետք է արտահերթ ընտրություններ անցկացվեն,նա նկատեց՝ իրենք չեն պատկերացնում, թե ինչպես կարող են 30 հազար և ավելի քվե ստացած քաղաքական ուժի և այդքան քաղաքացիների կարծիքը հաշվի չառնվեն, և Գյումրիում փոփոխություններ կատարվեն։
«Եթե ընտրությունների տանեն, կարծում եմ՝ համապետական և քաղաքային ընտրությունները երբեք ու երբեք չպետք է շփոթել իրար հետ, որովհետև միշտ էլ քաղաքի ընտրություններն ավելի ուրիշ արդյունք են ցույց տալիս, քան համապետական ընտրությունները»,- ասաց Առաքելյանը՝ հավելելով, որ արտահերթ ընտրությունների դեպքում գյումրեցիներն իրենց քվեով պետք է պատասխան տան ստեղծված իրավիճակին։
Առաքելյանը միաժամանակ տեղեկացրեց, որ իր՝ մանդատ վերցնել-չվերցնելու հարցը դեռևս չի քննարկել Վարդան Ղուկասյանի հետ։ Նա հույս հայտնեց, որ հուլիսի 17-ի նիստից հետո արդար վճիռ կկայացվի, և Ղուկասյանը կկարողանա վերադառնալ քաղաքապետի իր լիազորություններին։
Հիշեցնենք, որ Ավետիս Առաքելյանն ընդգրկված էր «Ուժեղ Հայաստան» կուսակցությունների դաշինքի նախընտրական ցուցակում և մանդատների բաշխուման գործընթացի արդյունքում կարող է գործուղվել խորհրդարան։
