Թեեւ դեկտեմբերի 5-ին Վանաձոր խոշորացված համայնքում նույնպես տեղական ինքնակառավարման մարմինների ընտրություններ են անցկացվել, բայց համայնքն առ այսօր ղեկավար չի ընտրել։ Կենտրոնական ընտրական հանձնաժողովը մանդատները բաշխել է, ավագանին կարող է ստանձնել լիազորությունները, բայց «Լուսավոր Հայաստան» կուսակցության առաջ քաշած դատական գործընթացների պատճառով ավագանին նիստ գումարել ու համայնքապետ ընտրել չի կարողանում։ Բանն այն է, որ ԼՀԿ-ն, չհաշտվելով կուսակցության առաջնորդ Էդոմոն Մարուքյանի ծննդավայր քաղաքում նախորդ ընտրությունների հետ համեմատած տասնապատիկ անգամ պակաս ձայներ հավաքելու ու մանդատներ չստանալու հանգամանքի հետ, ամեն գնով փորձում է գոնե մեկ մանդատ ստանալ։ Դատարանը սակայն ԼՀԿ-ի հայցը մերժել է։ Ավագանին, ըստ տրամաբանության, արդեն կարող է նիստ գումարել, բայց իշխանություններն ամեն կերպ փորձում են ձգձգել դրա անցկացումը։ Ու թեեւ նախկին քաղաքապետ, համայնքապետի թեկնածու Մամիկոն Ասլանյանը կալանքի տակ է, բայց դատարանը, ըստ օրենքի, պետք է ապահովի նրաՙ ավագնու նիստում համայնքապետ ընտրելու իրավունքը, քանի որ նա դեռեւս մեղադրյալ է։ Ըստ «Ազգ»ի ունեցած տեղեկություններիՙ իշխող «Քաղաքացիական պայմանագիր» կուսակցութունը վանաձորյանՙ իրենց իսկ կողմից ստեղծված թնջուկի համար լուծման երկու տարբերակ ունի։
Առաջինն այն է, որ մինչեւ քաղաքապետ ընտրելը ցանկանում են քաղաքապետի պաշտոնակատար նշանակել։ Ավելինՙ եթե ավագանին նիստ գումարի, ապա ՔՊ-ականները մտադիր են ոչ թե քաղաքապետ ընտրելու, այլ համայնքապետի պաշտոնակատար նշանակելու օրակարգն առաջ տանել։ Երկրորդ տարբերակը, որ քննարկում են, մանդատները դնելովՙ նոր ընտրության գնալն է։
