ՌԴ արտաքին գործերի նախարարության մամուլի խոսնակ Մարիա Զախարովայի՝ Հայաստանի հասցեին հերթական հայտարարությունը սպասելի էր. դրան զուգահեռ՝ ՌԴ-ի կողմից պետք է սպասել ավելի կոշտ հայտարարությունների և գործողությունների՝ տնտեսական լծակների գործադրմամբ ճնշումների և այլն, Azg.am-ի թղթակցի հետ զրույցում ասաց քաղաքագետ Արա Պողոսյանը։
Հիշեցնենք, որ Մարիա Զախարովան ավելի վաղ հայտարարել էր՝ ամբողջ աշխարհի աչքի առաջ Հայաստանը վերածվում է հայ ժողովրդի հիմնարար շահերի հետ լիովին հակասող հավաքական Արեւմուտքի ծայրահեղ վտանգավոր ծրագրերի իրականացման գործիքի։
«Ե՛վ Հայաստանում, և՛ Ռուսաստանում պետք է գիտակցեն, որ Հայաստանի Հանրապետությունը, որպես պետություն, իրավունք ունի սպասարկելու իր շահերը։ Թե որքանով են այդ շահերն այսօր ՀՀ իշխանությունները լավագույնս սպասարկում, թերևս կարելի է դիտարկել Հայաստանի այսօրվա անվտանգային միջավայրով։
Ինչ վերաբերում է Արևմուտքին, Հայաստանի հարաբերություններն Արևմուտքի հետ՝ հատկապես այդ հարաբերությունների կերպափոխումը դեպի ավելի խոր, ռազմավարական կապեր, միանշանակ առաջացնելու են Ռուսաստանի հակազդեցությունը։
Բնականաբար, ռուսաստանցի այս պաշտոնյան հայտնի է իր բավական կոշտ դիտարկումներով և սադրիչ հայտարարություններով, և եթե նայելու լինենք այս դիտանկյունից, նրա այս հայտարարությունները բացառապես Ռուսաստանի հետաքրքրությունները շոշափող հայտարարություններ են և հաճախ նույնիսկ իրականության հետ շատ քիչ աղերս ունեն»,- նշեց քաղաքագետը։
Արա Պողոսյանը միաժամանակ ընդգծեց՝ ՀՀ ներկա իշխանությունների վարած քաղաքականությունը չափազանց վտանգավոր է Հայաստանի իսկ համար. այն հավասարակշռված չէ, չունի ռազմավարական հիմնավորում, չկա արտաքին քաղաքականության հայեցակարգ, որով կշարժվեն ՀՀ իշխանությունները։
«Այսինքն՝ ՀՀ ներկա արտաքին քաղաքականությունը հիմնված է ոչ թե դոկտրինալ սկզբունքների, այլ իրավիճակային, հաճախ նույնիսկ ցայտնոտային արտաքին քաղաքականության կուրսի վրա, ինչը չի կարող բացասականորեն չազդել ՀՀ անվտանգության և արտաքին հարաբերությունների վրա։ Այս ամենը, բնականաբար, ՌԴ-Արևմուտք դիմակայության համապատկերում Ռուսաստանում պետք է ոչ միայն մտավախություններ առաջացներ, այլև Ռուսաստանը Հայաստանի նկատմամբ պետք է գործուն դիմադրության գործիքներ կիրառեր։
Մյուս կողմից պետք է հաշվի առնել, թե Հայաստան-Արևմուտք հրաբերությունների կերպափոխումն է ինչ է իրականում՝ հողի վրա, տալիս մեզ. արդյոք դրանից ՀՀ դիմադրողունակությունը բարձրանում է, արդյոք ՀՀ իշխանությունները կարողացել են ստեղծել այնպիսի միջավայր, որոնց պայմաններում ՌԴ-ի կողմից լծակների կիրառումը չի բերի Հայաստանում կոլապսային իրավիճակի՝ թե՛ տնտեսության, թե՛ լոգիստիկ համակարգի, թե՛ քաղաքական և դիվանագիտական, թե՛ ֆինանսական իմաստներով»,- նշեց Արա Պողոսյանը։
Ըստ նրա՝ միանշանակ է, որ Ռուսաստանն ունի ճնշում գործադրելու համապատասխան լծակներ, և դա հերքելն ուղղակի անհնար է։
«Այն, որ ՀՀ իշխանությունները մինչ այժմ չեն կարողացել և տեսանելի ապագայում չեն կարողանալու դիվերսիֆիկացնել հատկապես տնտեսական և լոգիստիկ համակարգը, սա ևս ակնհայտ է։ Եթե Ռուսաստանը որոշի կիրառել իր գործիքները, Հայաստանի, հայ տնտեսվարողի և շարքային բնակչի համար դա կարող է շատ ցավոտ հետևանքներ ունենալ։ Սա նաև ուղիղ ազդեցություն է ունենալու պետականության, պետական ինստիտուտների դիմադրողունակության վրա»,- ասաց քաղաքագետը։
Ամփոփելով՝ մեր զրուցակիցը շեշտեց՝ այն, որ Ռուսաստանի նկատմամբ ՀՀ իշխանությունների սադրիչ քաղաքականությունը բերելու է հայ-ռուսական հարաբերությունների նոր ճգնաժամի, ինքնին վտանգավոր է, և այս համատեքստում Մարիա Զախարովայի հայտարարությունը կարելի է վերջնագրային համարել։
