Հայաստանը շահագրգռված է շարունակելու զարգացնել առկա քաղաքական երկխոսությունը և ընդլայնելու գործընկերությունը ՆԱՏՕ-ի, ինչպես նաև առանձին անդամ պետությունների հետ։ Հուսով ենք, որ Հայաստան-ՆԱՏՕ համագործակցության նոր ձևաչափն անհատապես հարմարեցված գործընկերության ծրագիրը շուտով կհաստատվի, այսօր ՆԱՏՕ-ի գլխավոր քարտուղար Յենս Ստոլտենբերգի հետ համատեղ ասուլիսի ժամանակ հայտարարեց ՀՀ վարչապետ Նիկոլ Փաշինյանը։
«Մեր տարածաշրջանում տեղի ունեցած զարգացումների լույսի ներքո Հայաստանի համար չափազանց կարևոր է ուժեղացնել իր դիմակայունությունը և զարգացնել համապատասխան պաշտպանական կարողությունները»,- ասաց նա։
Նիկոլ Փաշինյանի խոսքով՝ Հայաստանը մեծապես կարևորում է սեփական մասնակցությունը խաղաղապահ գործողություններին և այն համարում կարևոր ներդրում միջազգային խաղաղության և անվտանգության ապահովման գործում։
«Հայկական խաղաղպահ ստորաբաժանումը շարունակում է իր ներդրումն ունենալ Կոսովոյի առաքելությունում, և, ինչպես տեղյակ եք, 2023 թվականի հուլիսին, երբ Կոսովոյում որոշակի անկայուն իրավիճակ էր, Հայաստանն ավելացրեց իր խաղաղապահ ստորաբաժանման անձնակազմը լրացուցիչ 17 զինծառայողով»,- ասաց Փաշինյանը։
Նա միաժամանակ հավելեց, որ արդյունավետ երկխոսություն է իրականացվում նաև խորհրդարանական հարթությունում, քանի որ հայ խորհրդարանականները ներգրավված են ՆԱՏՕ-ի խորհրդարանական վեհաժողովի նիստերին և «Ռոուզ-Ռոթ» սեմինարներին։
