Հոկտեմբերի 23-25-ն Ադրբեջանում կայանալիք թուրք-պադրբեջանական զորավարժությունները, բնականաբար, աննպատակ չեն, և ըստ էության՝ մինչև Հայաստանի և Ադրբեջանի միջև երաշխավորված մեխանիզմներով խաղաղության պայմանագիր չկնքվի, նոր հարձակման վտանգը միշտ էլ կլինի։ Azg.am-ի թղթակցի հետ զրույցում նման տեսակետ հայտնեց թուրքագետ Նելլի Մինասյանը։
Նրա խոսքով՝ թուրքական որոշ զինատեսակներ 44-օրյա պատերազմից հետո էլ շարունակում են մնալ Ադրբեջանում։
«Մինչև պատերազմը և պատերազմից հետո էլ թուրք-ադրբեջանական զորավարժությունները շարունակվել են, ընդ որում՝ համատեղ խոշոր զորավարժություններ անցկացվել են գրավյալ Բերձորում և Կարսում։
Մյուս կողմից թուրք զինվորականները 44-օրյա պատերազմից հետո շարունակում են մնալ Ադրբեջանում. անգամ պաշտոնական մակարդակով խոսվում է 60 հոգանոց խմբի մասին, իսկ ահա ոչ պաշտոնական տվյալներով խոսք կա մինչև անգամ թուրքական ռազմաբազաների ստեղծման մասին։
Այնպես որ, այսօր Ադրբեջանը ռազմական ոլորտում սերտաճած է Թուրքիային, և Հայաստանի վրա հարձակման վտանգը միշտ էլ առկա է»,- ասաց թուրքագետը։
Նելլի Մինասյանը միաժամանակ նկատեց, որ թուրք-ադրբեջանական տարածաշրջանային նկրտումներին իրական հակակշիռ և զսպիչ ուժ կարող են հանդիսանալ Իրանը և Արևմուտքը, որոնք երկուսն էլ գործնականում ցույց են տվել իրենց կենսունակությունը։
Հիշեցնենք, որ Հոկտեմբերի 23-25-ին Ադրբեջանում տեղի կունենան թուրք-ադրբեջանական հերթական զորավարժություններ։ «Մուստաֆա Քեմալ Աթաթուրք-2023» անունը կրող զորավարժությունները նվիրված են Թուրքիայի Հանրապետության 100-ամյակին, ինչի համար Ադրբեջան են բերվել նաև թուրքական F16-եր և ուղղաթիռներ։
Զորավարժությունները տեղի են ունենալու մի քանի ուղղություններով՝ այդ թվում Բաքվում, Նախիջևանում և Ադրբեջանի վերահսկողությանն անցած տարածքներում։
