Բունդեսթագի արտաքին հարաբերությունների հանձնաժողովի նախագահ, սոցիալ-դեմոկրատ, 1998-ից ժողովրդի ուղիղ քվեով 7 անգամ գերմանական օրենսդիրի պատգամավոր դարձած, 27 տարի Գերմանիայի քաղաքական կյանքում դերակատարում ունեցող Միշայել Ռոթը նոյեմբերի 26-ին նույնիսկ իր կուսակիցների համար անակնկալ հայտարարեց, թե էլ չի մասնակցելու ընտրություններին, ընդհանրապես լքում է քաղաքականությունը:
«Ազգ»ի էջերում քննադատել ենք Ռոթի՝ ծայրահեղացված ռուսատյացությունը, ՀՀ-ին ԵՄ անվտանգության իրական երաշխիքի փոխարեն վիզայի ազատականացման մասին խոստումով բավարարվելը, Բունդեսթագում Արցախի, Հայաստանի անվտանգության հարցով նիստ չհրավիրելը:
Միշայել Ռոթը, որը մշտապես աչքի է ընկել անկախ Ուկրաինայի, ինչպես նաեւ Իսրայելի պաշտպանությամբ, հուշում է, թե շարունակելու է այդ գաղափարներին իր հավատարմությունը: (Միգուցե նաեւ Հայաստանի հետ իր բարեկամությունը չմոռանա): Ռոթը գերմանացի թերեւս միակ քաղաքական գործիչն է, որի ուշադրության առանցքում Հայաստանն իր առանձնահատուկ տեղն ունեցել է, հատկապես 2020 թվականի պատերազմից հետո: Նա ԵՄ-ից աննահանջ պահանջել է Ադրբեջանի դեմ պատժամիջոցներ սահմանելու անհրաժեշտությունը, հուշել է սատարել Հայաստանին, օգտվել այն հնարավորությունից, որ ՌԴ-ն հեռացել է ՀՀ-ից, գնահատել Հայաստանի ժողովրդավարությունն ընտրելու, Ռուսաստանի գիրկը չվերադառնալու որոշումը, նկատել տվել Ադրբեջանի ավտորիտար համակարգի վտանգավորությունը, այդ երկրի՝ Հայաստանի դեմ ռազմական հարձակման սպառնալից ծրագիրը:
Ափսոսում ենք, որ Միշայել Ռոթը հեռանում է քաղաքականությունից: Նա միակն էր, որ մեր մասին խոսում էր:
ԱՆԱՀԻՏ ՀՈՎՍԵՓՅԱՆ
Գերմանիա
Լուսանկարում՝ «Բեռլինում ՀՀ դեսպան Վիկտոր Ենգիբարյանի հետ լուսանկարը Միշայել Ռոթի x-ի էջից է»:
