ԱՄՆ փոխնախագահն ասում է, որ խաղաղ միջուկային ծրագրի գործակցության առաջին փուլում ԱՄՆ 5 միլիարդ դոլարի նյութեր, տեխնոլոգիա կարտահանի Հայաստան, իսկ երկրորդ փուլի համար կկնքվի մոտ 4 միլիարդ դոլար արժողության պայմանագրեր:
Դա բացարձակապես չի նշանակում այդքան փողի ներդրում Հայաստանում: Դա նույնիսկ մոտավորապես դա չի նշանակում:
Ի՞նչ է մատուցվում պաշտոնական պրոպագանդայի մակարդակով: Որ ԱՄՆ 5 միլիարդ դոլար է ներդնելու Հայաստանում առաջին փուլով, 4 միլիարդ էլ՝ երկրորդ փուլով:
Ի՞նչ է սա, եթե ոչ փոխնապագահ Վենսի խոսքի աղավաղում: Նա բացարձակապես չի խոսում Հայաստանում այդքան փող ներդնելու մասին:
Բայց ըստ երեւույթին՝ ամերիկյան կողմը չի շտապի ուղղել «թարգմանական սխալը», որովհետեւ Վենսը նաեւ շատ հստակ, իհարկե ոչ ուղիղ խոսքով, բայց շատ թափանցիկ կերպով ասաց՝ իրենց նպատակը Նիկոլ Փաշինյանի վերընտրությունն է:
Ավելին, գուցե մի քիչ հնչի դավադրապաշտական, բայց չեմ բացառի անգամ, որ թարգմանական սխալը բոլորովին պատահական կամ թյուրիմացաբար չէր, այլ ծրագրված: Մի կողմից Վենսը իր ուղիղ խոսքով որեւէ պատասխանատու բան չի ասում Հայաստանում միլիարդներ ներդնելու մասին, մյուս կողմից պաշտոնական պրոպագանդային տրվում է այն հայերեն տարբերակով ըստ հայեցողության պտտելու «իրավունք»:
Ի վերջո առաջին անգամը հո չէ, որ «պտտելու» են հայ հանրության գլուխը: Մի պտույտ ավելի, մի պտույտ պակաս, ինչ տարբերություն:
Հակոբ Բադալյան, քաղաքական վերլուծաբան
