ՌԴ ուժերը հարձակողական գործողությունների ընթացքում լիարժեք հսկողություն են սահմանել Պավլովկա, Նիկոլսկոյե, Բլագոդատնոյե, Վոդյանովկա եւ Վլադիմիրովկա բնակավայրերի նկատմամբ: Այդ մասին հայտնել է ՌԴ ՊՆ գեներալ-մայոր Իգոր Կոնաշենկովը:
Օրվա ընթացքում գրանցվել է մինչեւ 9 կմ առաջխաղացում: Լուգանսկի Ժողովրդական Հանրապետության զորքերի խմբավորումը, շարունակելով հարձակողական գործողությունները, ազգայնականներից ազատագրել է Պոպասնայա քաղաքը: Մարտի 13-ի առավոտյան մեծ հեռավորության գերճշգրիտ զենքով հարված է հասցվել Ուկրաինայի զինված ուժերին Ստարիչի բնակավայրում եւ Յավորովսկի հրաձգարանում:
Նրա խոսքով՝ տվյալ օբյեկտներում Կիեւի ռեժիմը տեղակայել էր օտարերկրյա վարձկանների պատրաստման կետ նախքան ռուս զինվորականների դեմ ռազմական գործողությունների շրջաններ ուղարկելը, ինչպես նաեւ արտերկրից ստացվող զինամթերքի եւ ռազմատեխնիկայի պահպանության բազա:
«Հարվածի հետեւանքով ոչնչացվել է մինչեւ 180 օտարերկրյա վարձկան եւ օտարերկրյա զենքի խոշոր խմբաքանակ: Ուկրաինայի տարածք ժամանած օտարերկրյա վարձկանների ոչնչացումը կշարունակվի»,-ասել է Կոնաշենկովը:
Մարտի 13-ի ցերեկը Ռուսաստանի ավիացիայի եւ ռազմաօդային ուժերի ՀՕՊ համակարգերի միջոցով օդում խոցվել է Ուկրաինայի ռազմաօդային ուժերի 1 Սու-24 ինքնաթիռ Նովի Բիկով բնակավայրի շրջանում, ինչպես նաեւ 11 անօդաչու թռչող սարք, այդ թվում՝ 2 «Բայրաքթար ՏԲ-2»:
Օպերատիվ-տեխնիկական, բանակային եւ անօդաչու ավիացիայի կողմից խոցվել է ուկրաինական զինված ուժերի 46 օբյեկտ, այդ թվում՝ 3 կառավարման կետ, 1 զենիթահրթիռային համալիր, ռազմամթերքի 2 պահեստ եւ ռազմատեխնիկայի կուտակման 33 շրջան:
Գործողության ամբողջ ընթացքում շարքից դուրս է բերվել Ուկրաինայի ռազմական ենթակառուցվածքի 3736 օբյեկտ: Ոչնչացվել է 100 ինքնաթիռ, 139 անօդաչու թռչող սարք, 1234 տանկ եւ այլ զրահապատ մեքենաներ, 122 համազարկային կրակի ռեակտիվ համակարգեր, 452 դաշտային հրետանու զենք եւ ականանետներ, 1013 միավոր հատուկ ավտոմոբիլային տեխնիկա, հավելել է ՌԴ ՊՆ-ի ներկայացուցիչը:
News.am
