Հաշվի առնելով հին բարքերի վերադարձն ու Երևանում հակաժողովրդավարական միտումները՝ ազդարարում ենք «Երևան 782» անունով նոր նախաձեռնության մասին, որն ունենալու է ավելի լայն օրակարգ՝ ծառահատումներ, կանաչապատում, օդի աղտոտվածություն, հանրային տրանսպորտ, քաղաքաշինական խնդիրներ, վճարովի կայանատեղիներ և այլն։ «Երևանում հակաժողովրդական կառավարման միտումների և հանրային անվստահության մասին» թեմայով ասուլիսի ժամանակ այսօր այս մասին հայտարարեց «Չենք վճարելու» նախաձեռնության ներկայացուցիչ Յուրի Մովսեսյանը:
«Մեզ համար իրականում զարմանալի էր, որ Երևան քաղաքի բնակիչները զրկված են տեղական ժողովրդավարության հիմնական սկզբունքներից և հարթակներից: Փաստացի Երևանում տեղական ժողովրդավարությունը տևական ժամանակ կասկածի տակ է դրված։ Օրինակ՝մարդիկ չեն կարողանում մասնակցել ավագանու նիստերին, չունեն հնարավորություն ֆորմալ ու ոչ ֆորմալ մեխանիզմներով իրենց ձայնը բարձրաձայնել, որ իրենք ինչ-որ որոշման կողմ են կամ դեմ են։
Այս առումով մենք փորձելու ենք հենց դառնալ նմանատիպ մարդկանց համար հարթակ և նաև ամեն ինչ անել, որպեսզի Երևանում տեղական ժողովրդավարության մեխանիզմները վերականգնվեն:
Երևանի բյուջեի հետ կապված մենք տեսնում ենք բազմաթիվ հետաքննություններ, հոդվածներ, որ շատ հաճախ այդ գնումները, ծախսերը ոչ տեղին են, համաչափ չեն, չեն բխում Երևանում այս պահին գործող կարիքներից: Այստեղ շատ կարևոր է, որ բացի խմբակցությունները, որ գործունեություն են ծավալում ավագանիում, նաև լինի քաղաքացիական վերահսկողություն։
Մենք գործունեության մի շարք տեսակներ ենք կիրառելու, սկսած մոնիտորինգային, հետաքննական նյութերի հրապարակումից վերջացրած տարբեր հանրային իրազեկման, հանրային արշավներ, գործողություններ, որոնք միտված են լինելու, որ Երևան քաղաքի բնակիչները հնարավորություն ունենան այլընտրանք ունենալ և քաղաքացիական նախաձեռնության տեսքով տարբեր խնդիրներ բարձրաձայնել:
Մենք նաև մտածել ենք այն մասին, թե ինչպես կարող են քաղաքացիները միանալ, որովհետև ըստ էության սա լինելու է հենց ազատ հարթակ բոլոր մտահոգ բնակիչների համար: Մենք չունենք ինչ-որ հստակ գաղափարական ուղղվածություն, այսինքն կուսակցական չենք: Մենք ստեղծելու ենք տարբեր հետաքրքիր հարթակներ, օնլայն, օֆլայն, տարբեր բնույթի մարդկանց կարիքներին համապատասխանող հարթակներ մեզ միանալու համար ու հետևողական աշխատանք ենք տանելու, որպեսզի մարդիկ անպայմանորեն ներգրավեն այս նախաձեռնությունը»,-ասաց նա:
Հարցին՝ եթե տրանսպորտի սակագնի հետ կապված հաջողություն չունեցան, արդյոք այս դեպքում հաջողություն կունենան, Մովսեսյանը պատասխանեց.
«Իրականում եթե կոնտեքստը նայենք, ի սկզբանե մեր նախաձեռնությունը մի քանի մատահոգ քաղաքացիներին միավորում էր, և այն ռեսուրսները, որ մենք ունեցել ենք, միանշանակ հաջողել ենք։ Խնդիրն այն է, որ այն բարձր նպատակը, որ դրվել է՝ տրանսպորտի սակագնի փոփոխությունը, ինքը կիսով չափ է հաջողել, բայց միևնույն ժամանակ, քանի որ մարդիկ մեզ դիմում էին, որ իրենք պատրաստ են ներգրավել, տարբեր հարցեր բարձրաձայնել, միայն տրանսպորտը չէ խնդիրը, մենք կարծում ենք, որ այդ մարդկանց ներգրավելով այս նախաձեռնությունը կարողանալու է որոշակի հաջողությունների հասնել»:
