Բլոգեր Ալեքսանդր Լապշինը ներկայացրել է Վառնայից ոչ հեռու՝ բուլղարական Պլիսկա գյուղում գտնվող մի համալիր, որն իր մեջ ներառում է ամրոց, թանգարան և ռեստորանային համալիր։ Բլոգերի խոսքով՝ այս ամենն ստեղծել է ավելի քան 30 տարի առաջ Բուլղարիա տեղափոխված ազգությամբ հայ Կարեն Ալեքսանյանը։
«Այս համալիրը կոչվում է «Կիրիլիցայի տուն», այս վայրի մասին գիտի ամբողջ Բուլղարիան։ Այստեղ եղել են Բուլղարիայի նախագահը, նախարարներըը, պատգամավորները։ Իսկ ահա Հայաստանում այս շքեղ համալիրի մասին ոչ ոք չգիտի»,- տեսանյութում պատմում է Լապշինը։
Համալիրի տարածքում, բլոգերի ներկայացմամբ, կա ինչպես հայկական խաչքար, այնպես էլ բուլղարական այբուբենի՝ խաչքարի ոճով փորագրված տառեր։ Տարածքում առկա է նաև հին եկեղեցի, Բուլղարիայի պատմության թանգարան։
«Այստեղ բերում են դպրոցականների, այստեղ գալիս են քաղաքական գործիչներ։ Կիրիլիցայի թանգարանում ամեն բան մտածված է խիստ մանրակրկիտ կերպով։ Այստեղ կան հոգևորականների, Բուլղարիայի Բորիս Առաջինի արքայի և թագուհի Մարիա Բուլղարացու մոմե արձանիկներ»,- նշել է Ալեքսանդր Լապշինը՝ միաժամանակ ներկայացնելով ամրոցի բակում տեղադրված, կիրիլիցայով ստեղծագործած տարբեր հեղինակների կիսանդրիներ։
Ալեքսանդր Լապշինը նաև պատմում է, որ համալիրի տարածքում բավական զգալի տեղ է գրավում հյուրանոցային համալիրը։
«Առաջին հարկում ռեստորանն է, երկրորդ հարկում՝ հյուրանոցային համարները։ Բակում ամառային տաղավարներն են, մանկակակն խաղահրապարակը, որտեղ կարող են խաղալ երեխաները։ Մի փոքր այն կողմ բաղնիքն է՝ SPA համալիրը՝ տաք լողավազանով»,- ասում է Լապշինը։
Ամփոփելով՝ բլոգերը կրկին շեշտում է, որ Բուլղարիայի ամենահայտնի պատմամշակութային համալիրի սեփականատերը հայազգի Կարեն Ալեքսանյանն է՝ բոլորին խորհուրդ տալով լինել այնտեղ, քանի որ համալիրը շատ դուր կգա բոլորին։
