Մենք պատրաստ ենք ցանկացած պատերազմի, բայց միևնույն ժամանակ ոչ մի պատերազմ չենք նախաձեռնի, հայտարարել է Իրանի Իսլամական հեղափոխության պահապանների կորպուսի (ԻՀՊԿ) հրամանատար, գեներալ-մայոր Հոսեյն Սալամին, փոխանցում է Mehr-ը։
«Մենք ուսումնասիրել ենք այս թշնամուն հաղթելու բանաձեւերը»,- նշեց նա։
Իսլամական հեղափոխության պահապանների կորպուսի հրամանատարն ընդգծել է, որ «մենք թշնամու առաջ ոչ մի քայլ չենք նահանջի»։
Նա խոսեց նաև անցյալ տարի Իսրայելի վրա Իրանի ռազմական հարվածների մասին, որոնք պատասխան էին «ռեժիմի ջանքերին՝ սպանելու դիմադրության հրամանատարներին», հիշեցնելով, որ «Իրանը հարձակվեց այն ռեժիմի վրա, որին առաջին հերթին աջակցում էին արևմտյան երկրները»:
ԱՄՆ նախագահ Դոնալդ Թրամփը մարտի վերջին NBC News-ին տված հարցազրույցում Իրանին «ռմբակոծություններով» է սպառնացել և «երկրորդային մաքսատուրքերով», եթե երկիրը համաձայնության չգա ԱՄՆ-ի հետ՝ երաշխավորելով, որ միջուկային զենք չի մշակի:
«Եթե նրանք համաձայնության չգան, ռմբակոծությունները կսկսվեն: Դա կլինի այնպիսի ռմբակոծություններ, ինչպիսին նրանք նախկինում չեն տեսել», – ասել է Թրամփը Իրանի մասին:
