ՔՊ պատգամավոր Արուսյակ Ջուլհակյանն այսօր՝ .«Ազգային ճգնաժամի և կառավարման ձախողման մասին» ԱԺ հայտարարության նախագծի քննարկման ժամանակ, ԱԺ «Պատիվ ունեմ» խմբակցության ղեկավար Հայկ Մամիջանյանին հիշեցրեց՝ վերջիններիս հրավիրած լսումներին մի բուդդիստ կին կար, որն ասում էր, որ ինքը ազգի էլիտան է։
«Կխնդրեմ նշել՝ ինքը տեղ գտնելո՞ւ է միասնության կառավարությունում, թե ոչ»,- կիսահեգնական տոնով դիմելով Մամիջանյանին՝ հարց ուղղեց Ջուլհակյանը։
«Տիկի՛ն Ջուլհակյան, ես մի քիչ զարմացած եմ, որ լիբերալ արժեքների, մարդու իրավունքների ջատագով և կին լինելով՝ եթերում թիրախավորում եք կնոջը։ Ձեր հեգնական ոճը տիկին Մանանդյանի նկատմամբ ինձ համար շատ-շատ տարակուսելի է։ Կարծում եմ՝ գնահատականը պետք է տան իրավապաշտպան միջազգային կազմակերպությունները, այդ թվում՝ կանանց իրավունքներով զբաղվող կառույցները, որոնց հետ դուք սերտ համագործակցել եք մինչ իշխանության գալը»,– արձագանքեց Մամիջանյանը։
Հայկ Մամիջանյանը միաժամանակ ընդգծեց, որ միասնության կառավարության գործընթացը պաշտոնների կամ իշխանության բաժանման գործընթաց չէ։
«Բայց հաշվի առնելով, որ ձեր քաղաքական ուժը, Նիկոլ Փաշինյանի գլխավորությամբ ամեն գնով պատրաստ է իշխանություն պահպանել, տրամաբանական է, որ այս հարցը պետք է տայիք։ Սպարապետ Վազգեն Սարգսյանն ասել է. «Աթոռի համար կռիվ մի արեք, տղերք, հողի համար կռիվ արեք, որ այդ աթոռը դնելու հող լինի»։ Սա Ձեր հարցի պատասխանն է»«- ասաց Մամիջանյանը։
Ջուլհակյանը հավաստիացրեց, որ ինքը որևէ մեկին թիրախավորելու նպատակ չէր հետապնդում, պարզապես կարծում է, որ ժողովրդի համար պետք է պարզ լինի՝ ինչ կառավարություն է իրեն սպասվում։
Մամիջանյանը պնդեց, որ վերոնշյալ կնոջ՝ Էլեոնորա Մանանդյանի դավանած կրոնի մասին շեշտադրումն արդեն իսկ թիրախավորում է։
