«Բրյուսովի անվան պետական համալսարանը միայն 15 տոկոսով է մանկավարժական կրթություն տալիս, 85 տոկոսը սոցիոլոգիական, հասարակագիտական, թարգմանական, հաղորդակցությանը վերաբերող մասնագիտություններ են։ Եթե Բրյուսովը միացնում են մանկավարժական համալսարանին, այս 85 տոկոս ուսանողների ճակատագիրն ի՞նչ է լինելու, նրանց որտե՞ղ են տեղավորելու»,-հարցնում է բողոքի ակցիայի մասնակից դեկան Ցոլակ Ակոպյանը։
Բրյուսովի համալսարանը վերջին 5 տարում ուսանողների 65 տոկոս աճ է գրանցել, դիմորդների թվով բուհը Հանրապետությունում 3-րդն է։ Եթե կա դժգոհություն կրթական որակից կամ դասավանդվող մասնագիտություններից, ապա բուհի ղեկավարությանը դրա մասին ոչ ոք ոչինչ չի ասել։ Եթե կառավարությունը կարծում է, թե Բրյուսովի համալսարանը մանկավարժներ է պատրաստում, ու այդ հիմքով է որոշվել այն միացնել մանկավարժականին ու ֆիզկուլտինստիտուտին, ապա դա իրականությանը չի համապատասխանում։ Մանկավարժական ուղղվածություն բուհը չունի։
ԿԳՄՍ նախարար Վահրամ Դումանյանը Կառավարության նիստից հետո, լրագրողների հետ ճեպազրույցում այդպես էլ չկարողացավ պատասխանել, թե ինչ տրամաբանությամբ են երեք բուհերը միավորում։ Եթե մանկավարժական կրթության հիմքով է, ապա կոնկրետ Բրյուսովի դեպքում այդ հիմքը բացակայում է։ Բայց նախարարը հենց այդ բացակա հիմքն էլ համարեց միավորման տրամաբանություն։ «Մանկավարժական համալսարանը պատրաստում է մանկավարժներ, ֆիզկուլտինստիտուտը՝ ֆիզկուլտի մանկավարժներ, Բրյուսովն էլ՝ օտար լեզուների մանկավարժներ». ահա նախարարի «տրամաբանական» հիմնավորումը։
Ինչ վերաբերում է խոշորացված բուհի անվանը, Վահրամ Դումանյանն այստեղ էլ դժվարացավ պատասխանել։ Կիսահոդաբաշխ միակ արտահայտությունը սա էր՝ անունը… Կրթական գիտությունների ինստիտուտ։
