Երբ Հայոց ցեղասպանության ճանաչումը տեղի է ունենում զուտ քաղաքական նպատակահարմարության ծիրում՝ այս դեպքում թուրք-իսրայելական հարաբերությունների վատացման ֆոնին, ինչպես նաև հաշվի առնելով հայ ժողովրդի հետ Արցախում 2023 թվականին տեղի ունեցած վերջին ցեղասպանական ակտը, այս պարագայում Իսրայելի քայլը ո՛չ ողջունել է լինում, ո՛չ դատապարտել։ Azg.am-ի թղթակցի հետ զրույցում նման տեսակետ հայտնեց միջազգայնագետ Մենուա Սողոմոնյանը՝ անդրադառնալով Իսրայելի կառավարության կողմից Հայոց ցեղասպանության ճանաչմանը։
«Ինչպես մեզնից դեռ 150 տարի առաջ Մաղաքիա Օրմանյանն է ասել (խոսքը հայ աստվածաբան, հայագետ, պատմաբան և Կոստանդնուպոլսի հայոց պատրիարքի մասին է՝ խմբ.) Հայկական հարցը շատ պետությունների համար զուտ Թուրքիայի գլխին մտրակ ճոճելու միջոց է։ Այդ առումով շատ բան չի փոխվել։
Իհարկե, չեմ կարող կանխատեսում անել՝ արդյոք Իսրայելի Քնեսեթը կճանաչի Հայոց ցեղասպանությունը, թե ոչ, սակայն չի բացառվում, որ էսկալացիայի և վերբալ փոխհրաձգհությունների դեպքում Քնեսեթը համապատասխան բանաձև ընդունի»,- ասաց Մենուա Սողոմոնյանը։
Հարցին՝ ի՞նչ կտա Հայաստանին Իսրայելի կողմից Ցեղասպանության ճանաչումը, միջազգայնագետը պատասխանեց՝ անկախ նրանից, թե ինչ նկատառումներով է ճանաչումը տեղի ունենում, Հայաստանի Հանրապետության և հայ ժողովրդի շահերից է բխում, որ Ցեղասպանության իրողությունը ճանաչվի և դատապարտվի՝ որպես քաղաքական ակտ։
«Բայց մյուս կողմից մենք ունենք իշխանություններ, որոնք ձեռքերը լվացել են Հայոց ցեղասպանության միջազգային ճանաչման հարցից և այն դուրս դրել ՀՀ արտաքին քաղաքական օրակարգից։ Երբ տարբեր պետություններ ճանաչում էին Ցեղասպանությունը, և դրա հիմքում ՀՀ դիվանագիտական ջանքն էին, սփյուռքի լոբբինգն էր, դա շատ հասկանալի էր, բայց այն, որ ճանաչումը տեղի է ունենում մտրակ ճոճելու նկատառումով, դրան պետք է զգուշավոր մոտենալ»,- ամփոփեց Մենուա Սողոմոնյանը։
Հիշեցնենք, որ Իսրայելի կառավարությունը պաշտոնապես ճանաչել է Հայոց ցեղասպանությունը՝ կողմ քվեարկելով անցյալ շաբաթվա վերջին արտաքին գործերի նախարար Գիդեոն Սաարի կողմից ներկայացված բանաձևի առաջարկին։ Առաջարկն այժմ նախատեսվում է ներկայացնել Քնեսեթի լիագումար նիստի քվեարկությանը։
Թուրքիայի արտաքին գործերի նախարարությունը դատապարտել է Իսրայելի կողմից Հայոց ցեղասպանությունը ճանաչելու որոշումը։
