Իսրայելի քայլերն, ըստ էության, քաղաքական են՝ չնայած որ այդ երկրի արտգործնախարար Գիդեոն Սաարը պատմությունից և բարոյականությունից է խոսում։ Azg.am-ի թղթակցի հետ զրույցում նման տեսակետ հայտնեց թուրքագետ Նելլի Մինասյանը՝ անդրադառնալով Իսրայելի կառավարության կողմից Հայոց ցեղասպանությունը պաշտոնապես ճանաչելու փաստին։
«Մեծ հաշվով սա քաղաքական քայլ է, և այն պետք է դիտարկել այսօր առկա թուրք-իսրայելական լարված հարաբերությունների համատեքստում։ Որովհետև երկու կողմերն էլ միմյանց նկատմամբ առնվազն հայտարարությունների մակարդակով քաղաքականություն են ձևավորում, և եթե Թուրքիայում ինչ-որ գործընթացներ տեղի ունենան, Թուրքիան Իսրայելի համար ակնհայտորեն կդառնա հաջորդ Իրանը։
Քաղաքական և ոչ միայն քաղաքական բնույթի խնդիրներ կան, որոնք Իսրայելի մոտ անհանգստություններ են առաջացնում՝ այդ թվում Թուրքիայի հռետորաբանությունը։
Կրկնում եմ՝ իմ տեսանկյունից այս ամենը լրիվ քաղաքական որոշում է։ Ճիշտ չի լինի ասել, որ Իսրայելը դրանով ճնշում է Թուրքիային, որովհետև իրականում չեմ տեսնում ճնշման մեխանիզմը։ Չեմ տեսնում նաև, որ Իսրայելը դրանով ինչ-որ առումով կսահմանափակի Թուրքիային։ Սա ուղղակի մի քաղաքական քայլ է, որն Իսրայելի իշխանություններն իրականացնում են Թուրքիայի դեմ»,- ասաց թուրքագետը։
Ըստ Նելլի Միանսյանի՝ հատկանշական է, որ Թուրքիան, լինելով մեկ դարից ավելի ժխտողական քաղաքականություն որդեգրած ցեղասպան պետություն, ցեղասպանության մեղադրանք է ներկայացնում Իսրայելին։
«Փաստացի Իսրայելն այսօր Գազայում ցեղասպանություն է իրականացնում, այնպես որ, կարծում եմ, այդ խնդիրը Իսրայելի և Թուրքիայի միջև դեռ երկար կքննարկվի։
Ինչ վերաբերում է Իսրայելի Քնեսեթի կողմից Հայոց ցեղասպանության ճանաչմանը, կարծում եմ, որ եթե այդ երկրի կառավարության միաձայն ընդունեց փաստաթուղթը և այն տարավ Քնեսեթ, ապա այնտեղ ևս այդ բանաձևը հաստատվելու է։ Այսինքն՝ կարծում եմ, որ Իսրայելը պաշտոնապես կճանաչի Հայոց ցեղասպանությունը։
Բայց ինչ կտա սա Հայաստանին՝ չեմ կարող ասել։ Ես չեմ տեսնում այն ոլորտները կամ գործընթացները, որոնց վրա ճանաչումը կազդի։ Եթե Ցեղասպանությունը ճանաչում է Միացյալ Նահանգները, և դա որևէ գործընթացի վրա չի ազդում, Իսրայելի կողմից ճանաչումը ևս որևէ գործընթացի վրա չի ազդելու։
Սա ուղղակի քաղաքական համատեքստում է. երբ Թուրքիան Իսրայելին ցեղասպան պետություն է կոչում, Իսրայելն իր հերթին նույնը Թուրքիային է ասում։ Ցավալի է, բայց մեր խնդիրը կրկին օգտագործվում է այլ պետությունների կողմից։ Սա ամենադասական օրինակներից է»,- ասաց մեր զրուցակիցը։
Հարցին՝ արդյոք իր գնահատմամբ սա յուրօրինակ մտրակ է, որով ցանկանում են զսպել իսրայելաիրանական պատերազմում Իրանին սատարող Թուրքիային, Նելլի Մինասյանը պատասխանեց.
«Ես, ըստ էության, համաձայն չեմ այն մտքի հետ, որ իսրայելաիրանական պատերազմում Թուրքիան Իրանին է պաշտպանում։ Իրականում Թուրքիան մաքսիմալ փորձում է տարածաշրջանում այնպիսի իրավիճակ ստանալ, որ իրեն չվնասի։ Իսկ Իրանի դեմ պատերազմը ամենատարբեր առումներով վնասում է Թուրքիային, այսինքն՝ Թուրքիայի գործողություններն ավելի շուտ պետք է այս համատեքստից դիտարկել»։
Հիշեցնենք, որ Իսրայելի կառավարությունը պաշտոնապես ճանաչել է Հայոց ցեղասպանությունը՝ կողմ քվեարկելով անցյալ շաբաթվա վերջին արտաքին գործերի նախարար Գիդեոն Սաարի կողմից ներկայացված բանաձևի առաջարկին։ Առաջարկն այժմ նախատեսվում է ներկայացնել Քնեսեթի լիագումար նիստի քվեարկությանը։
Թուրքիայի արտաքին գործերի նախարարությունը դատապարտել է Իսրայելի կողմից Հայոց ցեղասպանությունը ճանաչելու որոշումը։
