«Նրանք գնում են մարդ փրկելու: Բանալի բառը՝ ՄԱՐԴ: Անփորձանք վերադառնաք, սիրելի փրկարարներ»,- ֆեյսբուքայն էջում գրել է ՀՀ վարչապետի աշխատակազմի ղեկավար Արայիկ Հարությունյանը և կից՝ հրապարակել աղետի գոտիներ մեկնող հայ փրկարարների լուսանկարները։
4.700 հայ հավանել է նրա գրառումը, 270 հոգի այն տարածել սոցցանցերում, 500-ից ավելին էլ ցնծությամբ ու բերկրանքով ընդունել իշխանության նախաձեռնությունը, նշել, որ հայը չպետք է թուրքին պատասխանի թուրքի պես։ Եթե թուրքը սպանում է, հայը պետք է ցույց տա իր մեծահոգի, գթասիրտ լինելը, ապացուցի, որ ինքը խաղաղասեր, մարդասեր է, պետք է օգնի, փրկի դժվար իրավիճակում հայտնված մարդուն՝ անկախ այն բանից՝ թո՞ւրք է, թե մեկ ուրիշ ազգից։
Բնականաբար, այս գրառման տակ «հարձակում» հրամանն է ստացել ֆեյքերի ագրեսիվ բանակը՝ փիսոների, շունիկների, վարդափնջերի քողարկիչ նկարներով։
Ու վայը տարել է նրան, ով կես բերան կհակադարձի, թե՝ արցախյան պատերազմի ժամանակ Թուրքիան անթաքույց աջակցեց Ադրբեջանին, թուրքական բայրաքթարներն ու զանգվածային ոչնչացման մյուս զենքերը թափվեցին մեր 18-20 տարեկան զինվորների վրա ու մոխրացրին նրանց, որ Թուրքիան այսօր էլ մատ է թափ տալիս Հայաստանի վրա, թե՝ պարտավոր ես ամեն ինչ անել Ադրբեջանին գոհացնելու համար, այլապես տես, հա՜…
Վայն եկել-տարել է նրան, ով այս գրառման տակ կհիշեցնի 2 ամիս շրջափակման մեջ գտնվող Արցախի մասին ու կհամարձակվի մեղադրել Թուրքիային, թե այդ երկիրը հայատյաց է և արցախահայության ցեղասպանությանն աջակցում է Ադրբեջանին։
Իսկ Էրդողանն այսօր նորից է հիշեցրել Թուրքիայի ու Ադրբեջանի եղբայրության մասին՝ ես քեզ եմ օգնել Ղարաբաղյան պատերազմում, դու էլ ինձ ես օգնում երկրաշարժի օրերին։
