ՀՀ չորրորդ նախագահ Արմեն Սարգսյանի գրասենյակն արձագանքել է Իրանի նախկին արտգործնախարար Մոհամմադ Ջավադ Զարիֆի հարցազրույցին, որում նա պատմել է, թե ընդլայնված կազմով հանդիպումից հետո ՀՀ նախագահի հետ երկկողմ զրույցի ընթացքում Արմեն Սարգսյանը խնդրել է Ադրբեջանի նախագահ Իլհամ Ալիեւին փոխանցել հետևյալ ձևակերպմամբ իր պատգամը. «28 տարի առաջ մենք հզոր էինք, իսկ Ադրբեջանը՝ թույլ: Մենք տիրացանք Ղարաբաղին, ձեզ նվաստացրինք ու ձեզ հետ չբանակցեցինք: 28 տարի ձեզ ստորացրինք ու այս օրն ընկանք: Դուք մեր սխալը չկրկնեք»:
«Մամուլում շրջանառվող` Հանրապետության չորրորդ նախագահ Արմեն Սարգսյանին վերագրվող խոսքերը աղավաղված մեկնաբանություններ են, որոնք խեղաթյուրում են խոսակցության իրական էությունը»,- ասված է ՀՀ չորրորդ նախագահի գրասենյակի տարածած մեկնաբանության մեջ:
Արմեն Սարգսյանի գրասենյակն այս հրապարակումն արել է՝ ի պատասխան «Ազգ» շաբաթաթերթի ապրիլի 11-ի համարում տեղ գտած «Երեւանի պատգամը Բաքվին» հոդվածի։
Հեղինակը՝ Իրանի Իսլամական Հանրապետությունում նախկին դեսպան, բազմամյա փորձառություն ունեցող իրանագետ Գրիգոր Առաքելյանն անդրադարձել է 44-օրյա պատերազմի ավարտից 6 ամիս անց Երեւան այցելած Իրանի նախին արտգործնախարար Մոհամմադ Ջավադ Զարիֆի և ՀՀ նախկին նախագահ Արմեն Սարգսյանի հանդիպմանն ու զրույցին։
«Իրանցի դիվանագետն օրերս իր տեսագրված հարցազրույցներից մեկի ժամանակ երեւանյան հանդիպումից ուշագրավ մանրամասներ է ներկայացրել: Ըստ Մոհամմադ Ջավադ Զարիֆի, ընդլայնված կազմով հանդիպումից հետո ՀՀ նախագահի հետ երկկողմ զրույցի ընթացքում Արմեն Սարգսյանը խնդրել է Ադրբեջանի նախագահ Իլհամ Ալիեւին փոխանցել հետեւյալ ձեւակերպմամբ իր պատգամը. «28 տարի առաջ մենք հզոր էինք, իսկ Ադրբեջանը՝ թույլ: Մենք տիրացանք Ղարաբաղին, ձեզ (ադրբեջանցիներին Գ.Ա.) նվաստացրինք ու ձեզ հետ չբանակցեցինք: 28 տարի ձեզ ստորացրինք ու այս օրն ընկանք: Դուք մեր սխալը չկրկնեք»:
Զարիֆը նաեւ հավելում է.
«ՀՀ նախագահի պատգամը Բաքվում փոխանցեցի նախագահ Իլհամ Ալիեւին, ընդգծելով, որ խաղաղությունը պետք է հաստատել այն ժամանակ, երբ հզոր ես: Իլհամ Ալիեւն էլ տրամաբանական համարեց այդ խոսքերն ու ասաց, որ Ադրբեջանն այդպես էլ վարվելու է»:
Արդյո՞ք Արմեն Սարգսյանը պատրաստ է այսօր արձագանքնել Մոհամմադ Ջավադ Զարիֆի՝ մասնավոր զրույցի ընթացքում իրեն վերագրված խոսքերին, եւ արդյո՞ք ՀՀ նախկին նախագահը կհաստատի Ալիեւին վերը նշված բովանդակությամբ պատգամ հղելու մասին Զարիֆի ասածները»,-«Ազգ» շաբաթաթերթ՝ ապրիլի 11-ի համարում լույս տեսած իր հոդվածում գրել է Գրիգոր Առաքելյանը։
Ինչպես նշեցինք, ՀՀ չորրորդ նախագահի գրասենյակից հայտնել են, որ Արմեն Սարգսյանին վերագրվող խոսքերը աղավաղված մեկնաբանություններ են, որոնք խեղաթյուրում են խոսակցության իրական էությունը։
Գրիգոր Առաքելյանը, ի պատասխան Արմեն Սարգսյանի գրասենյակի հայտարարության, հանրության ուշադրությանն է ներկայացնում վերոնշյալ հարցազրույցի տեսանյութը, ինչպես նաև հետևյալ հաղորդագրությունը. «Հրապարակելով Իրանի նախկին ԱԳ նախարար Մոհամմադ Ջավադ Զարիֆի խնդրո թեմայի մասին տեսագրված պարսկերեն հարցազրույցը, հայտնում ենք, որ «Ազգ»-ը տվյալ նյութի թարգմանության հարցում եղել է ծայրաստիճան ուշադիր և չի խեղաթյուրել խոսակցության իրական էությունը, այնպես ինչպես ներկայացված է ՀՀ չորրորդ նախագահի գրասենյակի կողմից»։
