Շանթ Կարապետյանը, կամ նույն ինքն Շակարտը, հաճախ է իր խոսքում շեշտում. «Արվեստը բժշկում է մարդկանց, բժշկական դեղամիջոցներից առավել»: Մասնագիտությամբ վիրաբույժ Շանթը ինքնուս նկարիչ է: Հոկտեմբերի 11-ից 13-ը տեղի ունեցավ նրա թվով 3-րդ անհատական ցուցահանդեսը Երեւանում, նախորդը Վենետիկում էր:
Ցուցահանդեսի խորագիրը կինն էր` «Եվան»: Ներկայացված կտավներից 40-ը Եվայի եւ 1 կտավը Լիլիթի մասին էին, Լիլիթը՝ Եվայի բացասական տեսակը՝ ըստ առասպելաբանության, որին անդրադարձել է նաեւ վարպետը՝ Ավետիք Իսահակյանը: Նկարչի նպատակը մեկն է. գովերգել կնոջն ու կատարելության աստիճանի պատկերել իր կտավներում:
«Կինն անբացատրելի է, անհասկանալի՝ լավ առումով: Ես փորձում եմ իմ պրիզմայով անցկացնել նրան, քանի որ նա բնության լավագույն ստեղծագործությունն է: Ես փորձում եմ կնոջը ներկայացնել իմ ոճով, իմ արվեստով: Հետեւաբար, կանանց ասում եմ՝ իրենք հրաշալի են եւ կատարյալ»:
Պլաստիկ վիրաբույժ Շանթ Կարապետյանը նկարել սկսել է 10 տարեկանից: Սկզբում նկարչությունը հոբբի էր համարում: Հետո սկսեց ավելի մասնագիտանալ` նկարել բրնձի հատիկների, դեղահաբերի, լուցկու տուփերի, համալսարանի գրատախտակի վրա, մինչեւ հերթը հասավ կտավներին:
«Երբեք ոչ մի ուսուցիչ չեմ ունեցել, ես եմ եղել իմ ուսուցիչը եւ սովորել եմ իմ սխալների վրա: Ես իմ համար վերցնում էի «աստիճաններ» ու բարձրանում»:
Նկարիչն այս ցուցահանդեսով ամփոփում է կյանքի իր այս շրջանը: Սա իր վերջին մեծ ցուցահանդեսն է՝ դադարից առաջ: Ասում է՝ առաջիկա տարիներին ուսումնասիրելու է քանդակագործության գաղտնիքները եւ լռելու է մինչեւ 2030 թ-ը:
ԷԼԵՆ ՄԻՐԶՈՅԱՆ
ՀՊՄՀ լրագրության 3-րդ կուրսի ուսանող
